Բուսաբանական այգում մեկնարկել են բարեփոխման միջոցառումներ. նախատեսվում է այն դարձնել երևանցիների ամենասիրած վայրը (տեսանյութ)
28-04-2017 17:30:54 | Հայաստան | Հասարակություն
Երևանում մեկնարկել են Բուսաբանական այգու բարեփոխման կարճաժամկետ և երկարաժամկետ մի շարք միջոցառումներ. Նպատակն է աջակցել ՀՀ ԳԱԱ Բուսաբանական այգում ստեղծված բուսական աշխարհի հարուստ բազմազանության պահպանմանը` նպաստելով նրա կայուն վերարտադրությանը:
Այս մասին ապրիլի 28-ին լրագրողների հետ հանդիպման ժամանակ տեղեկացրեց «Աջակցություն բուսաբանական այգուն» բարեգործական հիմնադրամի տնօրեն Սարգիս Աղայանը` ընդգծելով, որ ներկայումս այգում կան բազմաթիվ հիմնախնդիրներ, որոնք նախատեսում են լուծել առաջիկա հինգ տարիների ընթացքում:
Ըստ նրա` առանջնահերթ խնդիր է ապահովել բուսաբանական այգու անվտանգությունը, քանի որ այգու ցանկապատը վնասված է, հաճախակի հրդեհներ են բռնկվում, տեսախցիկները ոչ բոլոր հատվածներում են տեղադրված, կա նաև ոռոգման համակարգի բարելավման և ցուցանակների թարմացման անհրաժեշտություն:
«Մենք հիմա շատ ակտիվ աշխատում ենք բոլոր ոլորտների կազմակերպությունների հետ` սկսած IT-ից մինչև գիտական կառույցներ»,- ասաց Ս. Աղայանը` ընդգծելով, որ արդեն իսկ բազմաթիվ հետաքրքիր առաջարկներ են ստացել:
Բանախոսի փոխանցմամբ` այգում նախատեսվում են գործարկել թանգարաններ, կիսաանապատային ծառերի և թփերի Կասկադ անտառ պուրակ, եղրևանու և վարդերի կոլեկցիոն հողամասեր, արևադարձային և մերձարևադարձային բույսերի ջերմատուն, ինչպես նաև այգում անցկացվելու են պարբերական միջոցառումներ` աղբահավաքից սկսած մինչև հեծանվասպորտի սիրողական մրցաշար, փառատոններ, ջազ երեկույթներ, ցուցահանդեսներ, գիտա-կրթական միջոցառումներ, ֆիլմերի դիտումներ, մասնագիտական խորհրդատվական ծառայությունների մատուցում, բույսերի վաճառք:
Ս. Աղայանի խոսքերով` ամեն ինչ արվելու է, որպեսզի Բուսաբանական այգին դառնա Երևանի ամենաշատ հաճախելիություն ունեցող վայրը:
Կենս. գիտ. դոկտոր, պրոֆեսոր, ՀՀ ԳԱԱ Բուսաբանության Ինստիտուտի գլխավոր գիտաշխատող Գոհար Օգանեզովայի տեղեկացմամբ` 1935 թվականի հիմնադրված 80 հա տարածքով այգում պահպանվում է 650 տեսակի բույս` նախկին 1100-ի փոխարեն, իսկ այցելուների թիվը տարեկան կազմում է 20-30 հազար մարդ:
Նրա վստահեցմամբ` անհրաժեշտ ֆինանսական ռեսուրսների ապահովման և միջոցառումների իրականացման դեպքում հնարավոր կլինի վերականգնել բույսերի վերացած տեսակները:
Գ. Օգանեզովայի պնդմամբ` հիմնադրամի տնօրենը և աշխատանքային թիմը պատրաստ են քննարկել ցանկացած առաջարկ այգու բարեփոխման հետ կապված, սակայն մեկ բացառությամբ, որ դրանք չպետք է վնասեն այգու գիտական մասին:
ՀԱՅԵՐԵՆ
Русский
English
Դաս. հայերեն
French
