ԱԺ առաջին նիստը կնշանակվի մայիսի 18-ին. Տիգրան Մուկուչյան
28-04-2017 15:58:16 | Հայաստան | Ի՞նչ է գրում մամուլը
Նորընտիր խորհրդարանի առաջին նիստը կնշանակվի այսօրվանից հաշվարկված երրորդ հինգշաբթի օրը՝ մայիսի տասնութին:
Այս մասին Սահմանադրական դատարանի կողմից «Կոնգրես-ՀԺԿ» դաշինքի՝ ապրիլի 2-ին տեղի ունեցած Ազգային ժողովի ընտրությունների քվեարկության արդյունքներն անվավեր ճանաչելու վերաբերյալ դիմումի որոշման հրապարակումից հետո հայտնեց Կենտրոնական ընտրական հանձնաժողովի նախագահ Տիգրան Մուկուչյանը:
«Սահմանված ժամկետում կուսակցություններին կիրազեկենք, որ եթե ցուցակներում կան ընդգրկված անձինք, որոնք ցանկանում են ներկայացնել դիմումներ մանդատներ չստանալու մասին, ժամանակ ունենան պատշաճ իրականացնել»,-ասաց նա:
Տիգրան Մուկուչյանը հայտնեց, որ մանդատների բաշխումն արդեն տեղի է ունեցել, այսինքն` որոշվել է, թե յուրաքանչյուր կուսակցություն քանի մանդատ է ստանալու։ Այժմ արդեն կազմվելու է արձանագրություն, որտեղ արդեն անվանական կնշվեն այն պատգամավորների անունները, ովքեր ստանալու են մանդատներ:
ԿԸՀ նախագահը հայտնեց, որ մինչ այս մանդատից հրաժարվելու վերաբերյալ դիմում չեն ստացել, սակայն ենթադրում է, որ այդ ամենը պայմանավորած էր Սահմանադրական դատարանում գործի քննությամբ:
ՀԱՅԵՐԵՆ
Русский
English
Դաս. հայերեն
French
