Այլընտրանք, քան երկրից գնալը, չկա.Իջեւանցիները փակել են միջպետական ճանապարհը
10-05-2017 16:45:41 | Տավուշի մարզ | Ի՞նչ է գրում մամուլը
Քիչ առաջ «Հետք»-ը տեղեկություն ստացավ այն մասին, որ Տավուշի մարզկենտրոն Իջեւանով անցնող Մ4 միջպետական ճանապարհը փակվել է բնակիչների կողմից ի նշան բողոքի:
Ինչպես «Հետք»-ի հետ զրույցում պատմեց Աչաջուր գյուղի բնակիչ Սեւադա Ղուկասյանը, ով նույնպես բողոքի ակցիայի մասնակիցներից է, դժգոհության առիթ է հանդիսանում երկու հանգամանք՝ մարզի անբարեկարգ ճանապարհներն ու համայնքում փողոցային առեւտուրն արգելելու՝ Իջեւանի քաղաքային իշխանությունների կողմից կայացրած որոշումը:
Ինչպես ավելի վաղ հայտնել ենք, Տավուշի մարզով անցնող Մ4 միջպետական ճանապարհի ասֆալտի շերտը քայքայված է, եւ վարորդները ֆինանսական մեծ վնասներ են կրում: Զբոսաշրջիկների հոսքը դեպի մարզ բավականին նվազել է՝ պայմանավորված հենց այդ հանգամանքով:
Այս օրերին վերանորոգման աշխատանքներ են ընթանում, բայց չափազանց դանդաղ: Բացի այդ, ճանապարհները որոշ տեղերում, օրինակ՝ Հաղարծին գյուղի հատվածում, այն աստիճան հին ու քայքայված են, որ կարկատաններն էլ խնդիրը չեն լուծում:
Սեւադա Ղուկասյանը «Հետք»-ի հետ զրույցում ասաց, որ վերջերս մի քանի վթարներ են եղել՝ պայմանավորված ճանապարհների փոսերով:
Քաղաքացիների պահանջն է՝ խնդիրների լուծում կոնկրետ ժամկետներում, «Սահմանի բերանին ապրող ժողովուրդ են, գնում են, սարերից տանջանքով ծնեբեկ ու սինդրուկ բերում կամ իրենց այգու կանաչին բերում վաճառելու, արգելել են: Էս ժողովրդին այլընտրանք, քան երկրից գնալը, չկա: Պետք է հնարավորություն տալ: Դա ժողովրդի գոյատեւման նախապայման է», - ասաց Ղուկասյանը:
Որպես վերը բերված խնդիրների լուծման երաշխիք՝ բնակիչները պահանջում են Տավուշի մարզպետի խոստումը, բայց կոնկրետ ժամկետներով, հստակ:
Մեր ունեցած տեղեկություններով՝ այս պահին մարզպետ Հովիկ Աբովյանը բանակցում է քաղաքացիների հետ:
Քիչ անց լրացուցիչ տեղեկություն կհայտնենք բողոքի ակցիայի ընթացքի վերաբերյալ: Նշենք, որ մասնավորապես փակվել է միջպետական ճանապարհի Իջեւանի շուկայի հատվածը:
ՀԱՅԵՐԵՆ
Русский
English
Դաս. հայերեն
French
