Փաստաբան Ինեսսա Պետրոսյանը հրավիրվել է դատախազություն
22-05-2017 18:01:56 | Հայաստան | Ի՞նչ է գրում մամուլը
Հայտնի լեզվաբան Փառանձեմ Մեյթիխանյանի ամուսնու սպանության գործով տուժող կողմի ներկայացուցիչ, հայտնի փաստաբան Ինեսսա Պետրոսյանը դիմել է ՀՀ գլխավոր դատախազություն, որպեսզի դատարանում իրեն ուղղված հայհոյանքների և սպառնալիքների վերաբերյալ նյութեր նախապատրաստվեն և հարուցվի քրեական գործ:
Այս մասին Tert.am-ի հետ զրույցում ասաց փաստաբան Ինեսսա Պետրոսյանը:
«Դիմել եմ գլխավոր դատախազին, որպեսզի այդ փաստի վերաբերյալ նյութեր նախապատրաստվեն, հարուցվի քրեական գործ: Խնդիրն այն է, որ բավական երկար ժամանակ է անցել և ինձ նոր են հրավիրում Էրեբունու բաժին բացատրություն վերցնելու, այսօր նաև հրավիրվել եմ ՀՀ ոստիկանության կազմակերպված հանցավորության դեմ պայքարի գլխավոր վարչություն»:
ՀՀ ոստիկանության հասարակայնության հետ կապերի և լրատվության վարչությունից էլ Tert.am-ին հայտնեցին, որ փաստաբան Ինեսսա Պետրոսյանի վերաբերյալ հրապարակումներին ոստիկանությունը ծանոթ է և ոստիկանության կողմից իրականացվում են համապատասխան գործողություններ:
Նշենք, որ բացի դատարանում հնչեցրած հայհոյանքներից, Ինեսսա Պետրոսյանն իր ֆեյսբուքյան էջում սպառնալիք պարունակող բովանդակությամբ նամակներ էր հրապարակել, որը փաստաբանին էր ուղարկել Նարինե Արզումանյան անունով օգտատերը:
Այդ առնչությամբ ՀՀ փաստաբանների պալատի նախագահ Արա Զոհրաբյանը փաստաբան Ինեսսա Պետրոսյանի պաշտպանության համար անհրաժեշտ միջոցներ ձեռնարկելու և ՀՀ քրեական օրենսգրքով արգելված արարք կատարած անձանց նկատմամբ քրեական հետապնդում իրականացնել նպատակով դիմում է ներկայացրել ՀՀ ոստիկանության պետին:Փաստաբանների պալատի կողմից տարածված հաղորդագրության մեջ ասվում է. « Փաստաբան Ինեսսա Պետրոսյանի պաշտպանության համար անհրաժեշտ միջոցներ ձեռնարկելու և ՀՀ քրեական օրենսգրքով արգելված արարք կատարած անձանց նկատմամբ քրեական հետապնդում իրականացնելու նպատակով ՀՀ փաստաբանների պալատի նախագահ Արա Զոհրաբյանը 20.05.2017 թվականին դիմում է ներկայացրել ՀՀ ոստիկանության պետին»:
ՀԱՅԵՐԵՆ
Русский
English
Դաս. հայերեն
French
