«Մեր ազգային նպատակն ուժեղ եւ մրցունակ Հայաստանի կերտումն է». Էդուարդ Շարմազանով
24-05-2017 16:44:28 | Հայաստան | Մամլո հաղորդագրություն
ՀՀ ԱԺ փոխնախագահ Էդուարդ Շարմազանովը մայիսի 24-ին հանդիպել է ԵՊՀ միջազգային հարաբերությունների ֆակուլտետի քաղաքագիտության բաժնի ուսանողների հետ:
ԱԺ փոխնախագահ Էդուարդ Շարմազանովի հետ հանդիպումն ընթացել է հարցուպատասխանի ձեւաչափում: Հարցերն առնչվել են մեր երկրի զարգացման հեռանկարներին՝ թե՛ քաղաքական եւ թե՛ տնտեսական համատեքստում, ՀՀ-ԵՄ եւ ՀՀ-ԵԱՏՄ հարաբերություններին, արտաքին քաղաքական գործընթացներին, տարածաշրջանային խնդիրներին, մասնավորապես ԼՂ հակամարտության կարգավորմանը, սահմանային լարվածությանը, խորհրդարանական կառավարման համակարգին եւ այլ խնդիրների:
Անդրադառնալով ՀՀ իշխանությունների կողմից իրականացվող քաղաքականությանը՝ պարոն Շարմազանովն անդրադարձել է ԱԺ նիստում ՀՀ Նախագահ Սերժ Սարգսյանի ծրագրային ելույթին՝ կարեւորելով այն հանգամանքը, որ պետության ղեկավարը մեր երկրի զարգացման, առաջընթացի եւ անվտանգության տեսլականը ներկայացրել է ոչ թե կարճաժամկետ, այլ երկարաժամկետ եւ ռազմավարական ուղղություններով:
«Մեր ազգային նպատակն ուժեղ եւ մրցունակ Հայաստանի կերտումն է՝ ուժեղ նոր սերնդով. դա է Հայաստանի Հանրապետության հարստությունը»,-հավելել է Էդուարդ Շարմազանովը:
Խոսելով ԼՂ հակամարտության կարգավորման մասին՝ ԱԺ փոխնախագահն ընդգծել է. «ԼՂ հակամարտության կարգավորումը տարածքային վեճ չէ. մեր խնդիրն Արցախի ժողովրդի ինքնորոշման իրավունքի իրացումն է: Մեր նպատակն է հասնել նրան, որ Արցախի ժողովրդի կամքը պարտադիր լինի բոլորի համար»:
ՀՀ ԱԺ փոխնախագահը կարեւորել է հայ ժողովրդի միասնականությունը եւ հանդուրժողականությունը եւ հավելել, որ միայն այդ դեպքում մենք կարող ենք հաջողություններ գրանցել թե՛ արտաքին, թե՛ ներքին քաղաքական գործընթացներում:
Պարոն Շարմազանովն անդրադարձել է նաեւ ՀՀ-ԵՄ եւ ՀՀ-ԵԱՏՄ հարաբերություններին եւ առաջիկա անելիքներին՝ ընդգծելով, որ մեր երկիրն արտաքին քաղաքական գործընթացներում իրականացնում է հավասարակշռված քաղաքականություն:
ՀԱՅԵՐԵՆ
Русский
English
Դաս. հայերեն
French
