2100 տնտեսվարողներ հարկային պարտավորությունները չկատարելու հետևանքով հայտնվել են սնանկության վտանգի առջև
25-05-2017 11:59:30 | Հայաստան | Հասարակություն
2016-17 թվականներին տնտեսվարողների կողմից շուրջ 22 մլրդ դրամ հարկային պարտավորությունների չկատարման հետևանքով առկա է սնանկության ավելի քան 2100 վարույթ: Այս մասին մայիսի 25-ին կայացած ՀՀ կառավարության նիստի ընթացքում հայտարարեց վարչապետի պաշտոնակատար Կարեն Կարապետյանը:
Ըստ նրա` որոշ տնտեսվարողների նկատմամբ կարելի է կիրառել նաև սնանկության վարույթի այլընտրաքային միջոց, իսկ ստեղծված իրավիճակը պայմանավորված է թե՛ վարչարարության կազմակերպման, թե՛ օրենսդրության, թե սնանկության կառավարիչների բացահայտման և այլ խնդիրներով:
«Խնդրահարույց է նաև այն, որ այդ ոլորտում հարկային պարտավորությունների մասով գույքի կամ դրամական միջոցների արգելափակումը կատարվել է հայեցողաբար և ոչ համակարգված»,- նշեց Կ. Կարապետյանը:
Վերջինս խնդրի լուծման նպատակով ՀՀ պետական եկամուտների կոմիտեի նախագահին հանձնարարեց երկամսյա ժամկետում ուսումնասիրել և կառավարության աշխատակազմ ներկայացնել հարկային պարտավորությունների արտադատական կարգով վարչական բռնագանձման և ծանուցման ինստիտուտի, ինչպես նաև համաչափ արգելադրման կիրառման վերաբերյալ առաջարկություն՝ միաժամանակ ներկայացնելով տնտեսվարողների սնանկության հատկանիշների ճշգրիտ գնահատման և դրանք բացահայտելու պետական եկամուտների գործիքակազմ, ինչպես նաև առաջին կետով նախատեսված առաջարկությունները ներկայացնելուն պես մեկամսյա ժամկետում ներկայացնել առաջարկություններ հարկային պարտավորությունների մարման ժամանակացույցի հայեցողական լիազորությունների սահմանափակման և կանխատեսելիության բարձրացման վերաբերյալ:
Նույն խնդրի վերաբերյալ հանձնարարություն տրվեց նաև արդարադատության նախարարի պաշտոնակատարին. վերջինս պարտավորվեց երկամսյա ժամկետում ուոսումնասիրել և կառավարության աշխատակազմ ներկայացնել սնանկության մասին օրենքում փոփոխությունների վերաբերյալ առաջարկություններ՝ անդրադարձ կատարելով սնանկության վարույթների առողջացման գերակայությանը, սնանկության կառավարիչների պատասխանատուների խստացմանը, ֆինանսական վիճակի վերլուծության չկատարման հետևանաքներին և այլ հիմնախնդիրներին: