ՀՀ ՏԿԶ փոխնախարարն ընդունել է Միգրացիայի միջազգային կազմակերպության տարածաշրջանային տնօրենին
29-05-2017 16:49:39 | Հայաստան | Մամլո հաղորդագրություն
ՀՀ տարածքային կառավարման և զարգացման նախարարի տեղակալ Կարեն Իսախանյանն այսօր ընդունել է Միգրացիայի միջազգային կազմակերպության Հարավարևելյան Եվրոպայի, Արևելյան Եվրոպայի և Կենտրոնական Ասիայի տարածաշրջանային տնօրեն Արգենտինա Շաբադոսին: Հանդիպմանը մասնակցել են ՀՀ ՏԿԶՆ Միգրացիոն պետական ծառայության պետ Գագիկ Եգանյանը, Միգրացիայի միջազգային կազմակերպության (ՄՄԿ) հայաստանյան գրասենյակի ղեկավար Իլոնա Տեր-Մինասյանը:
Ողջունելով հյուրերին՝ ՏԿԶ փոխնախարար Կ. Իսախանյանը բարձր է գնահատել Միգրացիայի միջազգային կազմակերպության հետ համագործակցությունը՝ ուղղված Հայաստանում միգրացիոն հիմնախնդիրների լուծմանը: Իր խոսքում փոխնախարարը կարևորել է ՄՄԿ-ի դերակատարությունը՝ միգրացիոն ոլորտին առնչվող կայուն զարգացման նոր նպատակներն ազգային մակարդակում տեղայնացնելու և դրանց իրագործումն ապահովելու հարցում: «ՀՀ կառավարություն–ՄՄԿ առաջիկա տարիների համագործակցությունը պետք է ուղղված լինի հատկապես այս խնդիրների լուծման ուղղությամբ համատեղ քայլերի իրականացմանը»,-նշել է Կարեն Իսախանյանը: Կազմակերպությունը ներկայումս համակարգում է միգրացիոն հարցերով գլոբալ համաձայնագրի նախագծի մշակման աշխատանքները , որը ՄԱԿ-ի անդամ երկրները կստորագրեն 2018թ-ին:
Հանդիպմանը քննարկվել են ՄՄԿ հայաստանյան գրասենյակի հետ համագործակցության արդյունավետության բարձրացմանն առնչվող հարցեր: Հայաստանի միգրացիոն ոլորտին վերաբերող փաստաթղթերի մշակման, ՀՀ կառավարության առաջնահերթությունների և առկա կարիքների ընտրության արդյունավետության բարձրացման տեսանկյունից` ՏԿԶ փոխնախարար Կարեն Իսախանյանն առաջարկել է, որպեսզի ՄՄԿ հայաստանյան գրասենյակն ավելի սերտորեն համագործակցի Միգրացիոն պետական ծառայության հետ:
ՄՄԿ տարածաշրջանային տնօրեն Արգենտինա Շաբադոսը շնորհակալություն է հայտնել ընդունելության համար և ողջունել ՀՀ կառավարության պատրաստակամությունը՝ ուղղված միգրացիոն խնդիրների կառավարմանը: Նշելով, որ իր այս այցն ավելի շատ ընդհանուր ճանաչողական բնույթ է կրում, ՄՄԿ տարածաշրջանային տնօրենը տեղեկացրել է, որ աշնանը նախատեսվում է իր աշխատանքային այցը Հայաստան, որի ժամանակ ավելի մանրամասն կքննարկվեն բարձրացված հարցերը և կոնկրետ առաջարկներ կներկայացվեն:
Հանդիպմանը կողմերը վերահաստատել են համագործակցությունն ակտիվացնելու երկկողմ պատրաստակամությունը:
ՀՀ տարածքային կառավարման և զարգացման նախարարություն