ՌԴ Վորոնեժի մարզում Երեք մարդ, այդ թվում՝ երկու անչափահասներ, տուժել են Մոսկվա-Երևան երթուղին իրականացնող ավտոբուսի ճանապարհից դուրս գալու հետևանքով: Այդ մասին հայտնում է
news.rambler.ru-ն՝ վկայակոչելով ՌԴ ՆԳՆ մարզային գլխավոր վարչության մամուլի ծառայությանը:
«Այսօր առավոտյան Վերխնեմամոնսկի շրջանում Մ-4 «Դոն» ավտոճանապարհի 717-րդ կիլոմետրին Mercedes-Benz ավտոբուսի վարորդը կորցրել է տրանսպորտային միջոցի կառավարումը և դուրս եկել ճանապարհից: ՃՏՊ-ի հետևանքով վիրավորվել է երեք մարդ: Ավտոբուսն իրականացնում էր Մոսկվա-Երևան երթուղին, տրանսպորտային միջոցում կար 39 մարդ»,- հայտնել են մամուլի ծառայությունից:
ՆԳՆ տվյալներով՝ վիրավորների թվում կա երկու երեխա՝ Կրասնոյարսկի երկրամասի բնակիչ յոթամյա տղա և Կոստրոմայի մարզի բնակչուհի իննամյա աղջիկ։ Մամուլի ծառայությունից հավելել են, որ վիրավորները միջին ծանրության վնասվածքներով հոսպիտալացվել են:
Ոստիկանությունը ՃՏՊ-ի առնչությամբ ստուգում է իրականացնում:
«Այժմ ոստիկանները գործադիր իշխանության մարմինների հետ համագործակցությամբ լուծում են ավտոբուսի ուղևորներին հյուրանոցում տեղավորելու հարցը, մինչև հաջորդ ավտոբուսի ժամանումը և նշանակման վայր տեղափոխումը»,- հավելել են ՆԳՆ-ից: