Վարչապետը հրավիրել է խորհրդակցություն հացահատիկային մշակաբույսերի բերքահավաքի թեմայով
22-06-2017 15:23:03 | Արցախ (ԼՂՀ) | Մամլո հաղորդագրություն
Հունիսի 22-ին Արցախի Հանրապետության վարչապետ Արայիկ Հարությունյանը, գյուղնախարար Արամ Մխոյանի և շրջվարչակազմերի ղեկավարների մասնակցությամբ, հրավիրել է աշխատանքային խորհրդակցություն՝ քննարկելու հացահատիկային մշակաբույսերի բերքահավաքի և մթերման հետ կապված մի շարք հարցեր:
Գյուղնախարար Արամ Մխոյանը ներկայացրել է բերքահավաքի վերաբերյալ ցուցանիշներ, համաձայն որոնց հունիսի 22-ի դրությամբ հանրապետության տարածքում կատարվել է շուրջ 14 հազար հա հունձ՝ 25,3 ցենտներ միջին բերքատվությամբ, որն անցած տարվա ցուցանիշը գերազանցում է 2,7 ցենտներով: Առ այսօր հնձվել է 1000 հա ցորենի ցանքատարածություն՝ 34,2 ցենտներ միջին բերքատվությամբ, և 13 հազար հա գարու ցանքատարածություն՝ 24,9 ցենտներ բերքատվությամբ: Ա. Մխոյանի հավաստմամբ՝ հացահատիկային բերքահավաքի հետ կապված տեխնիկական խնդիրներ չկան, աշխատանքների բնականոն կազմակերպմանը որոշակիորեն խոչընդոտում են տեղումները:
Ա. Հարությունյանը շրջվարչակազմերի ղեկավարներից հետաքրքրվել է բերքահավաքի ընթացքում առաջացող խնդիրներով և լուծումներ առաջարկել դրանց վերացման ուղղությամբ:
Խորհրդակցության ավարտին կառավարության ղեկավարը համապատասխան հանձնարարականներ է տվել ներկաներին՝ բերքը հնարավորինս անկորուստ հավաքելու վերաբերյալ:
ԱՀ կառավարության աշխատակազմի տեղեկատվության և հասարակայնության հետ կապերի բաժին
ՀԱՅԵՐԵՆ
Русский
English
Դաս. հայերեն
French
