Երկու բարդ քվեարկությունների արդյունքում, ըստ էության, Պեդրո Ագրամունտը հեռացվեց «Եվրոպայի ժողովրդական կուսակցություն» քաղաքական խմբից: Այս մասին «Ազատություն» ռադիոկայանին ասել է ԵԽԽՎ հայաստանյան պատվիրակության նախագահ, ԵԽԽՎ փոխնախագահ, ԱԺ փոխխոսնակ Արփինե Հովհաննիսյանը:
«Առավոտյան թեժ քննարկում եղավ, մեկ ու կես ժամ միայն Ագրամունտին խմբից հեռացնելու հարցն էր դրված, որովհետև վիճարկվում էր առհասարակ նման քվեարկությունների լեգիտիմությունը, իրավական հիմքի առկայությունը»,- փոխանցել է Արփինե Հովհաննիսյանը:
Նրա խոսքով՝ փաստացի, քվեարկություն անցկացվեց քվեարկություն անցկացնելու հնարավորության մասին:
«Դրանից հետո 30 կողմ, 3 ձեռնպահ ձայներով Ագրամունտը հեռացվեց խմբից: Բոլոր նրանք, ովքեր դեմ էին, որ Ագրամունտը հեռացվի, խնդրել են իրենց անուններն ավելացնել արձանագրության մեջ, որ իրենք հրաժարվել են մասնակցել քվեարկությանը»,-ասել է ԵԽԽՎ փոխնախագահը: