Արմեն Հարությունյանը մասնակցել է «Ագրոլոգ» ընկերության օրգանական ուսումնաարտադրական կենտրոնի բացմանը


Արմեն Հարությունյանը մասնակցել է «Ագրոլոգ» ընկերության օրգանական ուսումնաարտադրական կենտրոնի բացմանը

  • 30-06-2017 17:53:48   | Արագածոտնի մարզ  |  Տնտեսություն

ՀՀ գյուղատնտեսության նախարարի տեղակալ Արմեն Հարությունյանն այսօր Արագածոտնի մարզի Աշտարակ քաղաքում մասնակցել է «Ագրոլոգ» ՓԲԸ-ի օրգանական ուսումնաարտադրական կենտրոնի պաշտոնական բացման արարողությանը:Կենտրոնի հանդիսավոր բացմանը ներկա էին Հայաստանում Եվրոպական միության 
պատվիրակության ղեկավար, արտակարգ և լիազոր դեսպան Պյոտր Սվիտալսկին, Ավստրիայի Հանրապետության դեսպանության տեխնիկական համագործակցության գրասենյակի ղեկավար Գերհարդ Շաումբերգերը և այլ պաշտոնատար անձինք:  «Օրգանական գյուղատնտեսությունը նպաստում է ոչ միայն ընդհանուր գյուղատնտեսության զարգացմանը, այլև կարևորվում է բնապահպանական և առողջապահական տեսանկյունից: Բացի այդ, ավելի բարձր շահութաբերություն է ապահովում գյուղացիական տնտեսությունների համար», - նշել է նախարարի տեղակալ Արմեն Հարությունյանը:
 
Փոխնախարարը նաև տեղեկացրել է, որ վերջերս մշակվել են ազգային ստանդարտներ, որոնցով հիմնականում կանոնակարգվում են ներքին սպառման համար օրգանական մթերքի արտադրման հիմնական ուղենիշները: Ներկայումս միջոցներ են ձեռնարկվում պետական օժանդակության գործիքների մշակման ուղղությամբ, որոնք 
միտված կլինեն օրգանական գյուղատնտեսությամբ զբաղվողներին աջակցելուն:Հայաստանում Եվրոպական միության պատվիրակության ղեկավար Պյոտր Սվիտալսկին իր հերթին նշել է, որ Եվրամիությունը կշարունակի աջակցություն ցուցաբերել Հայաստանի գյուղատնտեսության զարգացմանը: Նրա խոսքով` Հայաստանում 
գյուղատնտեսության ոլորտի զարգացման համար Եվրամիությունը ընդհանուր առմամբ տրամադրել է ավելի քան 25 մլն եվրո:Ավստրիայի Հանրապետության դեսպանության տեխնիկական համագործակցության 
գրասենյակի ղեկավար Գերհարդ Շաումբերգերը գոհունակություն է հայտնել այն հանգամանքով, որ օրգանական գյուղատնտեսությունը ՀՀ կառավարության առաջնայնությունների թվում է և վստահություն է հայտնել, որ ավստրիական գործընկերների միջոցով Հայաստանի գյուղական բնակավայրերում այլ ծրագրեր ևս 
կիրականացվեն:
 
Այնուհետև հյուրերը շրջայց են կատարել կենտրոնի տարածքով, ծանոթացել օրգանական սննդամթերքի վերամշակման արտադրամասին, նորարարական ջերմոցին, սառնարանային տնտեսությանը, հայկական օրգանական արտադրանքի նորաբաց խանութին և այլն:Միջոցառման ընթացքում կազմակերպվել է նաև հայկական օրգանական արտադրանքի բացօթյա ցուցահանդես-վաճառք, որի հիմնական նպատակն է նպաստել մարզում էկոտուրիզմի զարգացմանը և հարակից համայնքների տնտեսական ակտիվության բարձրացմանը:
 
 
ՀՀ գյուղատնտեսության նախարարության տեղեկատվության և
հասարակայնության հետ կապեր բաժին
Նոյյան տապան  -   Տնտեսություն