«Սոցիալ հոգեբանական և վիճակագրական հետազոտությունների կենտրոն» հասարակական կազմակերպությունը երեք ամիս շարունակ Վայոց ձորի մարզի Ելփին, Սալլի, Աղնջաձոր, Թառաթումբ, Գողթանիկ, Հերմոն, Եղեգիս, Զեդեա համայնքներում, Մալիշկայի և Եղեգնաձորի մի շարք կրթօջախներում իրականացրել է  պտղի սեռով պայմանավորված աբորտների կանխարգելմանն ուղղված միջոցառումներ։ 

«Մի՜ սպանիր» խորագիրը կրող ծրագիրը կյանքի է կոչվել ՀՀ Նախագահի աշխատակազմի կողմից հասարակական կազմակերպություններին հատկացվող դրամաշնորհի և Հայաստանի երիտասարդական հիմնադրամի հայտարարած մրցույթի շրջանակներում։ Ծրագիրն անցկացվել է 20-30 տարեկան մայրերի, երիտասարդ ընտանիքների, ավարտական դասարանի աշակերտների շրջանում:

 

«Սոցիալ հոգեբանական և վիճակագրական հետազոտությունների կենտրոն» ՀԿ ղեկավար Խնկանուշ Մարկոսյանը նշեց, որ ծրագիրը շարունակաբար անցկացվել է երեք տարիների ընթացքում, և այն ամբողջությամբ ընդգրկել է Եղեգնաձորի տարածաշրջանը։ Բոլոր համայնքներում կազմակերպվել են հանդիպում-քննարկումներ, կինոդիտումներ, այլ միջոցառուներ՝ ուղղված պտղի սեռով պայմանավորված աբորտների կանխարգելմանը։ Հանրությանը բաժանվել են են թեմայի վերաբերյալ տեղեկատվական թերթիկներ։

Խնկանուշ Մարկոսյանը կարևորեց ծրագրին տղամարդկանց մասնակցությունը։ «Շատ էին ավարտական դասարանների տղաները, և մենք ուրախ ենք, որ դպրոցն ավարտելուց հետո նրանք իրենց հետ կտանեն ոչ միայն տեսական գիտելիքներ տարբեր առարկաներից, այլև գիտելիքներ ընտանիքի, կյանքի, ամուսնության, ծնող դառնալու պատասխանատվության վերաբերյալ։ Մի շարք համայնքներում ցանկություն հայտնեցին որպես ծրագրի շարունակություն տեղերում ստեղծել կանանց ակումբներ՝ հետագայում նման հարցերը քննարկելու նպատակով»,- նշեց ՀԿ ղեկավարը։ 

Տիկին Մարկոսյանը նկատեց, որ ծրագիրն իրականացրել են տեղական ինքնակառավարման մարմինների հետ համագործակցաբար։ Առաջիկայում նախատեսում են կազմակերպել միջոցառում և հրավիրել ու մեծարել այն կանանց, ովքեր ունեն չորս և ավելի աղջիկ երեխաներ։

Ծրագրի արդյունքում, ինչպես նշում է Խնկանուշ Մարկոսյանը, սելեկտիվ աբորտների հետ կապված բավականին փոփոխություններ են նկատվում մարդկանց մտածելակերպում։ Նույնը վկայակոչում են նաև բժիշկները։ «Մենք շեշտը դնում ենք մտածելակերպի փոփոխության վրա։ Մենք մի բան ենք հասկացել. պետական օրենքներով կամ այլ կերպ հնարավոր չէ խնդրին լիարժեք լուծում տալ։ Անհրաժեշտ է մարդկանց մտածելակերպի, մոտեցումների փոփոխություն։ Մարդիկ խորությամբ չեն պատկերացնում խնդիրը, չեն պատկերացնում որ դա ոչ միայն իրենց անձնական, ընտանիքի, այլև ազգի հետ կապված, ժողովրդագրական խնդիր է»,- ասաց տիկին Մարկոսյանը՝ ավելացնելով, որ մտադիր են նման ծրագիր անցկացնել նաև Վայոց ձորի մարզի Վայքի տարածաշրջանում։ 

 

 

Հայաստանի երիտասարդական հիմնադրամի 

հասարակայնության հետ կապերի ծառայություն

 

Նոյյան տապան  -   Հասարակություն