Սաղ սուտ է, ես դրա հետ կապ չունեմ.Սամվել Բաբայանը՝ մեղադրանքի մասին
31-07-2017 17:32:48 | Հայաստան | Ի՞նչ է գրում մամուլը
Կենտրոն և Նոր Նորք վարչական շրջանների ընդհանուր իրավասության դատարանում այսօր մեկնարկեց «Իգլա»-ի գործով դատական նիստը և ամբաստանյալների ինքնությունը ճշտելուց հետո հետաձգվեց:
Ամբաստանյալների ինքնությունը ճշտելուց հետո Սանասար Գաբրիելյանի պաշտպան Կարապետ Աղաջանյանը դատարանին միջնորդեց հետաձգել դատական նիստը ամբաստանյալ Արմեն Պողոսյանի պաշտպանի բացակայության պատճառով:
Դատարանը բավարարեց միջնորդությունը և հաջորդ դատական նիստը նշանակեց օգոստոսի 28-ին, ինչը հարուցեց ամբաստանյալների դժգոհությունը:
Մասնավորապես Սանասար Գաբրիելյանն ասաց, որ ավելի լավ կլինի նիստը նշանակել օգոստոսի մեկին, ինչին Սամվել Բաբայանը հավելեց. «Չիմացանք՝ էս չորս ամիս է ինչի համար ենք նստած, մեզ էլ հարցրեք՝ օրը հարմա՞ր է, թե ոչ»:
Դատավորը պարզաբանեց, որ որպեսզի անհարկի նիստերը չհետաձգվեն, պաշտպաններն արձակուրդներից վերադարձած լինեն, այդ պատճառով էլ նիստը նշանակում է օգոստոսի 28-ին:
Նիստը հետաձգվելուց հետո դահլիճում ներկա լրագրողները Բաբայանին հարցրին,թե ինչ կասի իրեն առաջադրված մեղադրանքի մասին. «Սաղ սուտ է, ես դրա հետ կապ չունեմ»,-ասաց Բաբայանը:
Չնայած ուղեկցող գումարտակի անդամները փորձում էին Բաբայանին տանել նիստերի դահլիճից, այնուամենայնիվ Բաբայանը մոտեցավ նաև մեղադրող դատախազ Արամյանին: Թե ինչ խոսեցին, հայտնի չէ:
Մեղադրանքի մասին դահլիճից իր կարծիքը հայտնեց նաև Սանասար Գաբրիելյանը. «Սա սարքած է»:
Հիշեցնենք, որ « Իգլա»-ի գործով անցնում է վեց ամբաստանյալ՝ Արցախի հերոս Սամվել Բաբայանը, Սանասար Գաբրիելյանը, Արմեն Պողոսյանը, Կարեն Քոչարյանը, Անդրանիկ Քոչարյանը, Ժորա Զաքարյանը և Դավիթ Հարությունյանը: