Հուրգադա հանգստավայրի շրջանում սպիտակ շնաձկներ են հայտնվել, մեկ մարդ վիրավորվել է
08-08-2017 14:45:52 | Ռուսաստան | Ի՞նչ է գրում մամուլը
Եգիպտոսի Հուրգադա հանգստավայրի շրջանում սպիտակ շնաձկներ են հայտնվել, մեկ մարդ վիրավորվել է: Այդ մասին հայտնել են ՌԴ արտգործնախարարությունից, գրում է Интерфакс-ը:
«Եգիպտոսում՝ Հուրգադայի շրջանում, նկատվում է ագրեսիվ սպիտակ շնաձկների ակտիվություն, մեկ մարդ վիրավորվել է: Վերջին անգամ այստեղ շնաձկների հայտնվելը գրանցվել է 2015 թվականին»,- հայտարարել են գերատեսչությունում:
Սպիտակ շնաձուկը աշխարհի անմենախոշոր գիշատիչ ձկներից է։ Նրա երկարությունը մոտավորապես 5մ է և այն շատ վտանգավոր է մարդու համար։
2015 թվականի մարտին Մարսա-Ալամ հանգստավայրում շնաձկան հարձակման հետևանքով գերմանացի զբոսաշրջիկ է մահացել: Նա մահացել էր հիվանդանոցի ճանապարհին՝ ոտքին ստացած վնասվածքից:
Գերմանացի զբոսաշրջիկի վրա հարձակումն առաջինն էր 2010 թվականից ի վեր, երբ Շարմ էլ Շեյխ հանգստավայրում շնաձկների զոհ դարձան մի քանի զբոսաշրջիկ: Այդ ժամանակ մահացել էր գերմանուհի մի զբոսաշրջիկ, վիրավորվել երեք ռուս և Ուկրաինայի մեկ քաղաքացի: Դրանից հետո եգիպտական իշխանությունները հայտարարել են շնաձկների հարձակումներից խուսափելու միջոցները։
Ռուսաստանի և Եգիպտոսի միջև դեռևս 2015 թվականի նոյեմբերին ընդհատված օդային հարաբերությունների մինչ օրս չվերականգնման պատճառով, ՌԴ -ից կազմակերպված զբոսաշրջիկներ հանգստվայրում այս պահին չկան։