Հայաստանի Բրիտանական միջազգային դպրոցում ուսումնական առաջին տարում սովորելու է ավագ դպրոցի 18 աշակերտ (տեսանյութ)
11-09-2017 16:29:33 | Հայաստան | Հասարակություն
Հայաստանի Բրիտանական միջազգային (BISA) դպրոցում ուսումնական առաջին տարում սովորելու է ավագ դպրոցի 18 աշակերտ:
Ինչպես «Նոյյան Տապան»-ի թղթակցի հետ զրույցում տեղեկացրեց դպրոցի ակադեմիական տնօրեն Աշոտ Աբրահամյանը, իր տեսակով եզակի Հայաստանի Բրիտանական միջազգային դպրոցը հիմնվել է հեղինակավոր «Փիրսոն Էդուքեյշն» կրթական և գնահատման ծառայության կենտրոնի հետ երկարատև համագործակցության արդյունքում:
Ըստ նրա` նման միջազգային դպրոցի բացման նպատակն է բազմակողմանի, որակյալ և ժամանակակից միջազգային կրթությունը հասանելի դարձնել նաև հայ դպրոցականներին:
Ա. Աբրահամյանի խոսքերով` երկու տարի տևող ուսումնական գործընթացի ավարտին դպրոցի շրջանավարտներին տրամադրվելու է բրիտանական ավարտական վկայական (A Level-ի ատեստատ), որը ճանաչված է աշխարհի առաջատար համալսարանների կողմից և հնարավորություն է տալիս առանց լրացուցիչ քննություն հանձնելու` հետագա կրթությունը շարունակել համաշխարհային բարձրակարգ կրթական հաստատություններում:
«Ուսումնական առաջին տարին մենք երկու հոսքով ենք սկսում` բիզնես և տնտեսագիտություն, տեղեկատվական տեխնոլոգիաներ. Հայտարարած ունեինք նաև բնագիտական և հումանիտար հոսք, սակայն աշակերտների կողմից հետաքրքրություն այդքան էլ չեղավ»,- նշեց նա` հավելելով, որ առաջիկայում փորձելու են սեմինարների և այլ տեղեկատվական միջոցառումների կազմակերպմամբ խթանել աշակերտների շրջանում հետաքրքրվածությունը:
Ա. Աբրահամյանի փոխանցմամբ` Հայաստանում Բրիտանական միջազգային դպրոց ընդունվելու համար ավագ դպրոցի աշակերտները պետք է հանձնեն հիմնականում անգլերեն լեզվի և մաթեմատիկայի քննություն, ինչպես նաև կախված ընդունելության քննությունների արդյունքներից մասնակցեն հարցազրույցի:
«Այս տարի դպրոցում մինչև 100 տոկոս կրթաթոշակ ենք սահմանել, արդյունքում ընդունված 18 աշակերտներից 8-ը` սովորելու են կրթաթոշակով: Մենք կրթաթոշակների տրամադրման հարցում որևէ աջակցություն չունենք, ամբողջը փոխհատուցվում է մեր բյուջեից` հնարավորություն տալով շատ լավ արդյունքներ գրանցած աշակերտներին ֆինանսի պատճառով չզրկվել այս բացառիկ տարբերակից»,- փաստեց BISA-ի ակադեմիական տնօրենը` տեղեկացնելով, որ կրթաթոշակները տրամադրվում են ռոտացիոն սկզբունքով:
Նշենք, որ դպրոցում ընդունելությունը կազմակերպվելու է երկու անգամ` ձմռան և ամռան ամիսներին: