Ստեփանակերտում կրկին հնդկական ապրանքների ցուցահանդես-վաճառք կկազմակերպվի. կժամանի նաև հնդիկ պարուհի.«Արցախպրես»
21-09-2017 19:56:54 | Արցախ (ԼՂՀ) | Մամլո հաղորդագրություն
Սեպտեմբերի 22-ին Ստեփանակերտում տեղի կունենա հնդկական ապրանքների ցուցահանդես-վաճառք:
«Արցախպրես»-ի թղթակցի հետ զրույցում ցուցահանդես-վաճառքի կազմակերպման պատասխանատու, «Dreams» ընկերության տնօրեն Նավադ Անսարին ասել է, որ վաճառքում ձևավորվելու է շուրջ 25 տաղավար` 16 հնդիկ գործարարի մասնակցությամբ:
«Տաղավարներում ներկայացված է լինելու հնդկական կահույքի, զարդերի, հագուստի, անկողնային պարագաների, սննդի և դիմահարդարման պարագաների բազմազան տեսականի»,- ասել է Ն. Անսարին և հավելել, որ այն գործելու է մինչև հոկտեմբերի 3-ը:
Ն. Անսարին նշել է նաև, որ տարեցտարի արցախցիների կողմից հնդկական ապրանքատեսականու նկատմամբ զգալի հետաքրքրություն է նկատվում:
«Արդեն երրորդ անգամ կազմակերպվող ցուցահանդեսի նորույթներից կլինի հնդիկ պարուհու և դհոլահարի ներկայացումները, ովքեր կփորձեն տոնական բարձր տրամադրություն հաղորդել մասնակիցներին ու այցելուներին, ինչպես նաև ցանկացողներին կսովորեցնեն հնդկական պարեր»,-տեղեկացրել է Ն. Անսարին:
Նշենք, որ հնդկական ապրանքների ցուցահանդես-վաճառքը կազմակերպվելու է Ստեփանակերտի Տիգրան Մեծի 10 հասցեում (հարկային ծառայության շենքի հարևանությամբ):
ՀԱՅԵՐԵՆ
Русский
English
Դաս. հայերեն
French
