Հայկական Ինտերնետ կառավարման 3-րդ համաժողովը փորձի և մտքերի փոխանակման, գործարար նոր կապեր հաստատելու կարևոր հարթակ է. նախարար
02-10-2017 11:01:31 | Հայաստան | Գիտություն եւ տեխնոլոգիաներ
Երևանում մեկնարկել է Հայկական Ինտերնետ կառավարման 3-րդ համաժողովը՝ ArmIGF 2017-ը:
Նպատակն է ոլորտի շահագրգիռ բոլոր կողմերի մասնակցությամբ քննարկել և լուծումներ առաջարկել այն բոլոր խնդիրներին ու մարտահրավերներին, որոնք առաջ են եկել Ինտերնետի աննախադեպ արագ զարգացման հետևանքով:
Համաժողովի ընթացքում այս տարի քննարկվում են «Ավանդական գրադարանները թվային դարում», «Ինտերնետի ազդեցությունը ռադիոյի և հեռուստատեսության վրա», «Տեղեկատվական անվտանգություն և կիբերանվտանգություն», «Անձնական տվյալները թվային դարում», «Բաց կառավարության համագործակցություն», «Ամպային տեխնոլոգիաներ», «Հաշմանդամների իրավունքները թվային դարում» թեմաներին առնչվող հարցերը:
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանի գնահատմամբ՝ Հայկական Ինտերնետ կառավարման 3-րդ համաժողովը փորձի և մտքերի փոխանակման, գործարար նոր կապեր հաստատելու և ամրապնդելու, ինտերնետ կառավարման ոլորտի ժամանակակից ձեռքբերումները ներկայացնելու կարևոր հարթակ է:
«Ինչպես գիտեք ՏՏ ոլորտը շարունակում է մնալ մեր երկրի տնտեսական զարգացման գերակա ուղղություններից մեկը: ՀՀ կառավարությունն իր որդեգրած քաղաքականությանը հավատարիմ մնալով՝ մեծ ջանքեր է գործադրում ՏՏ ոլորտի արդյունավետ զարգացման համար»,- ընդգծեց նախարարը:
Նրա փոխանցմամբ՝ 2017 թվականի առաջին կիսամյակում ՏՏ ոլորտում գրանցվել է 31 տոկոս տնտեսական աճ:
Վ. Մարտիրոսյանը վերահաստատեց, որ առանց հասարակության տարբեր շերտերի ներգրավման՝ հնարավոր չէ իրականացնել ինտերնետ կառավարումը:
Համաժողովի ընթացքում ելույթներով հանդես կգան ՄԱԿ-ի Ինտերնետ կառավարման համաժողովի քարտուղարության Ծրագրի և Տեխնոլոգիաների մենեջեր Չենգետայ Մասանգոն, Ինտերնետի անուններ և հասցեներ տրամադրող (ICANN) կազմակերպության ներկայացուցիչ Ալեքսանդրա Կուլիկովան, IP հասցեներ տրամադրող եվրոպական (RIPE NCC) կազմակերպության ներկայացուցիչ Մաքսիմ Բուրտիկովը, ինչպես նաև Ինտերնետ Հանրության եվրոպական բյուրոյի ներկայացուցիչ Ջերան Ունալը:
ՀՀ Ինտերնետ կառավարման հանձնաժողովի և «Ինտերնետ հանրություն» հասարակական կազմակերպության նախաձեռնությամբ անցկացվող համաժողովի ընթացքում ձևավորված կարծիքները, առաջարկությունները և դիտողությունները կմշակվեն և կներկայացվեն կառավարություն: