Արտաշես Գեղամյանը բռունցքներով հարձակվել է Նիկոլ Փաշինյանի վրա.168.am
05-10-2017 16:31:33 | Հայաստան | Մամլո հաղորդագրություն
Այսօր Ազգային ժողովում վիճաբանություն և ծեծկռտուք է տեղի ունեցել ՀՀԿ խմբակցության պատգամավոր Արտաշես Գեղամյանի և «Ելք» խմբակցության ղեկավար Նիկոլ Փաշինյանի միջև: Գևորգ Գորգիսյանը հայտարարեց, որ Գեղամյանը բռունցքներով հարձակվել է Փաշինյանի վրա: Գեղամյանի զայրութը հարուցել է ԱԺ ամբիոնում Փաշինյանի ելույթը, որում անդրադարձ էր եղել նաև Գեղամյանին։
«Եթե ազգային ժողովում պետք է բռունցքներով հարձակվեն մեզ վրա, իմանանք, որ մենք էլ համապատասխան ձևով պատրաստված գանք այստեղ՝ դուբինկաներով, կաստետներով կամ չգիտեմ էլ ինչերով»,- հայտարարեց Գորգիսյանը։
Սակայն Ա.Գեղամյանը լրագրողների հետ զրույցում հերքեց, թե ինքը որևէ մեկի վրա բռունցքներով հարձակվել է: Ըստ նրա` եթե նման բան լիներ, այդ մարդուն առնվազն հիվանդանոց կտեղափոխեն, քանի որ ինքը 3 տարի բռնցքամարտով է զբաղվել։
Փաշինյանի դեմքի կարմրությունը Գեղամյանը բացատրել է ամոթով. «Կարող է ամոթից է կարմրել, որովհետև, մարդ է, անհեթեթ հարցադրումներ է անում, խիղճը տանջել է, կարմրել է»: Սեփական շփոթվածությունը Գեղամյանը հիմնավորեց լրագրողների կողմից իր վրա «տաս հոգով հարձակվելու» հանգամանքով։
«Ես կես ժամ ա էստեղ նստած եմ, ի՞նչ բռունցքներ: Ինձ վրա նայում եք, կարո՞ղ եք ասել, որ ես կռիվ եմ արել»,- իր հերթին հարցադրում արեց Գեղամյանը։
Նիկոլ Փաշինյանը հրաժարվեց մեկնաբանել կատարվածը, միայն նշեց, թե «դա նշանակում է, որ Արտաշես Գեղամյանը Արտաշես Գեղամյանն է», իսկ միջադեպի մասին արդեն գրառում է արել Ֆեյսբուք սոցիալական ցանցում:
«Հենց նոր ԱԺ միջանցքում Ա. Գեղամյանը բռունցքներով հարձակվեց ինձ վրա։
Հաջողությամբ պաշտպանվեցի։ Մի երկու անգամ էլ կոշիկներս փայլեցրի իրենով։)
Ներողություն եմ խնդրում հանրությունից, որ ստիպված եմ աշխատել այս պայմաններում»,- գրառել է Նիկոլ Փաշինյանը:
ՀԱՅԵՐԵՆ
Русский
English
Դաս. հայերեն
French
