Շաբաթական դրութեամբ գործադրուող լրագրութեան վարժողական ծրագիրը երէկ շարունակուեցաւ «Ազդակ»-ի խմբագրատան մէջ: Վարժողական այդ ծրագիրին հետեւող « Ապագայ լրագրողներ»-ուն գրեթէ ամբողջական ներկայութեամբ հիւրընկալուեցաւ ՀՅԴ Լիբանանի տեղեկատուական գրասենեակի պատասխանատու Վիգէն Աւագեան, որ ներկայացուց լրագրութեան տարբեր ժանրերը եւ անոնց ընդմէջէն շեշտը դրաւ տիպար լրագրողի յատկանիշներուն վրայ: Ան շեշտեց, որ լրագրութեան մարզին մէջ գործելու համար պէտք է հետամուտ ըլլալ լուրերուն, ունենալ հետաքրքրութիւն եւ որոնել իրականութիւններ, տեղեկութիւններ ու տուեալներ: Վ. Աւագեան յայտնեց, որ օրուան կարեւորագոյն նիւթերը պէտք է անպայման տեսնել օրաթերթին մէջ: Վիգէն Աւագեան «Ապագայ լրագրողներ»-ուն ներկայացուց լրատուութեան, հարցազրոյցի, թղթածրարի եւ յօդուածագրութեան տեսակները, ինչպէս նաեւ բացատրեց խմբագիրին պարտականութիւնները` ընդգծելով արխիւ պահելու անհրաժեշտութիւնը:

---