Նուբարաշեն ՔԿՀ-ում չեն թույլատրում «Սասնա ծռեր» խմբի անդամ գեղանկարիչ Աշոտ Պետրոսյանին փոխանցել թուղթ և գրիչ.(տեսանյութ)
25-10-2017 15:26:11 | Հայաստան | Իրավունք
Տևական ժամանակ է, ինչ անազատության մեջ գտնվող «Սասնա ծռեր» խմբի անդամ՝ գեղանկարիչ Աշոտ Պետրոսյանը չի կարողանում իրացնել ստեղծագործողի իր իրավունքը, քանի որ նրան չի թույլատրվում փոխանցել թուղթ, գրիչ և մատիտներ:
Ինչպես հոկտեմբերի 25-ին լրագրողների հետ հանդիպման ժամանակ տեղեկացրեց փաստաբան Արայիկ Պապիկյանը, նշյալ խնդիրն առաջացել է Նուբարաշեն քրեակատորաղական հիմնարկ տեղափոխվելուց հետո:
«Նրան չեն թույլատրում փոխանցել ստեղծագործելու համար անհրաժեշտ առարկաներ, որոնք որևէ մեկ իրավական ակտով արգելված չեն»,- նշեց փաստաբանը՝ հավելելով, որ ՔԿՀ-ներում հիմնականում առաջնորդվում են ներքին կանոնակարգով, որի համաձայն՝ անազատության մեջ գտնվող անձը կարող է իր մոտ պահել գրիչներ՝ անկախ դրանց գույնից:
Ա. Պապիկյանի խոսքերով՝ տվյալ դեպքում Աշոտ Պետրոսյանին թույլատրում են ունենալ կապույտ գրիչ, բայց ոչ՝ կարմիր:
Նրա փոխանցմամբ՝ անգամ քրեական օրենսգրքում խրախուսվում է անազատության մեջ գտնվող, սակայն ստեղծագործող անձի զբաղվածությունը. «Մինչդեռ ՔԿՀ-ների ներքին կանոնակարգը կարող է արգելել անազատության մեջ գտնվող, բայց ստեղծագործող երաժշտին իր մոտ երաժշտական գործիք ունենալը»:
Առաջացած խնդիրն իրավական ճանապարհով լուծելու նպատակով՝ փաստաբանը բողոք-դիմում է ներկայացրել Հայաստանի Մարդու իրավունքների պաշտպանին, որի աշխատակազմը խնդրով դիմել է Քրեակատարողական հիմնարկների վարչություն:
Բանախոսը նկատեց, որ Քրեակատարողական հիմնարկների վարչությունից պատասխան է ստացվել առ այն, որ Աշոտ Պետրոսյանին թույլատրվել է փոխանցել հասարակ մատիտներ այն դեպքում, երբ հստակ խնդիր է դրված եղել գունավոր գրիչների և մոմատիտների արգելքի հետ կապված:
Ա. Պապիկյանի գնահատմամբ՝ անազատության մեջ գտնվող Ա. Պետրոսյանի նկատմամբ այդպիսի վերաբերմունքի դրսևորումը ցույց է տալիս, որ նրա նկատմամբ կոնկրետ հետապնդում է տեղի ունենում՝ քաղաքական հայացքների համար:
ՀԱՅԵՐԵՆ
Русский
English
Դաս. հայերեն
French
