Սբ. Գեղարդ վանական համալիրի իգական անսամբլը մասնակցել է
Շտուտգարտի միջազգային փառատոնին
25-09-2009 19:00:00 | Հայաստան | Մշակույթ
ԵՐԵՎԱՆ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: «Կուրատորիում-Լորշ»
մշակութային կազմակերպության հովանավորությամբ Սբ. Գեղարդ վանական
համալիրի 8 հոգանոց իգական անսամբլը սեպտեմբերի 5-17-ին յոթ համերգ
է ունեցել Գերմանիայում: Իսկ սեպտեմբերի 8-ին անսամբլը մասնակցել է
Շտուդգարտի միջազգային փառատոնին, որի կազմակերպիչը «Բախ»
միջազգային ակադեմիան է: Անսամբլը համերգ է ունեցել նաեւ Մաուլ
Բռոնի նշանավոր վանքում:
Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում նշեց անսամբլի
գեղարվեստական ղեկավար, արվեստագիտության թեկնածու Մհեր Նավոյանը,
համերգաշարը նվիրված էր Կոմիտասի 140 ամյակին: Ըստ նրա, բոլոր
համերգների նախաբան խոսքում ներկայացվում էր Հայաստանը: Բացի այդ,
տպագրվել են հատուկ բուկլետներ, որոնցում ներկայացվել են Կոմիտասի
կենսագրական տվյալները: «Հրատարակվել է նաեւ ծրագրային գրքույկ,
որտեղ ոչ միայն ներկայացվել է անսամբլի երգացանկը, այլեւ հայ
հոգեւոր երաժշտության, հայ ժողովրդի պատմությունը»,- ասաց
Մ.Նավոյանը:
Նա նշեց, որ տեղի մամուլը լայնորեն եւ դրական գնահատականներով
լուսաբանել է անսամբլի ելույթները, իսկ ռադիոն ձայնագրել է
փառատոնային համերգը, որն հեռարձակելու է նոյեմբերի 7-ին:
«Ընդունելությունը շատ բարձր մակարդակի էր, նույնիսկ մի փոքր
նախանձում էինք, որ մեր մշակույթը ավելի շատ ընկալվում եւ
ընդունվում է օտարների կողմից, քան հայրենիքում»,- ասաց
Մ.Նավոյանը: Ըստ նրա, Հայաստանում դասական երաժշտությունը անկում է
ապրում, ինչի պատճառը հասարակության ճաշակի այլասերումն է, ինչում
մեծ դերակատարում ունեն, հատկապես, հեռուստաընկերությունները:
Մ.Նավոյանը նշեց նաեւ, որ 2001թ.-ին կազմավորված անսամբլը
հանդես է եկել եվրոպական մի շարք երկրներում, մասնավորապես,
Ավստրալիայում, Գերմանիայում, Ֆրանսիայում, մասնակցել մի շարք
միջազգային փառատոների: