Ամբողջ երկիրը վերածվել է քրեակատարողական հիմնարկի, որտեղ մարդիկ նույնիսկ ապրելու իրավունք չունեն, ուր մնաց ստեղծագործեն. Ռուբեն Հախվերդյան (տեսանյութ)
25-10-2017 16:11:22 | Հայաստան | Հասարակություն
«Ամբողջ երկիրը վերածվել է քրեակատարողական հիմնարկի, որտեղ մարդիկ նույնիսկ ապրելու իրավունք չունեն, ուր մնաց ստեղծագործեն»,- նկատում է երգիչ, երգահան Ռուբեն Հախվերդյանը:
Վերջինս, հոկտեմբերի 25-ին լրագրողների հետ հանդիպման ժամանակ անդրադառնալով անազատության մեջ գտնվող «Սասնա ծռեր» խմբի անդամ, գեղանկարիչ Աշոտ Պետրոսյանին ստեղծագործելու իրավունքից զրկելուն, նշեց, որ վաղուց բոլորի համար պարզ է, որ Հայաստանը դարձել է անարդարությունների երկիր, իսկ անազատության մեջ գտնվող գեղանկարչի նկատմամբ վերաբերմունքն այդ անարդարության չնչին դրսևորում է:
«Մեր մարդիկ այստեղ ապրելու իրավունք չունեն, դրա համար էլ խոպան են գնում, ես դեռ չեմ խոսում գործազուրկների մասին, ուրեմն էլ ինչ ստեղծագործելու իրավունքի մասին է խոսքը»,- ասաց Ռ. Հախվերդյանը:
Վերջինիս խոսքերով, եթե բանտում կարմիր բերետավորները կարողանում են դաժան ծեծի ենթարկել ազգային հերոսին՝ Միայնակ Գայլին (Արայիկ Խանդոյան), ապա մյուսների իրավունքները ևս կխախտվեն:
Իր հերթին գեղանկարիչ Նիկոլ Աղաբաբյանը նկատեց, որ «Սասնա ծռերի» դեպքում անձնական վրեժխնդրություն է տեղի ունենում, ուստի օրենքի որևէ տառ չի պահպանվել ու չի պահպանվելու:
«Այն, ինչ տեղի է ունենում, շատ ցավալի է, բայց այլ կերպ ես չեմ էլ պատկերացնում այս երկրում: Բացի դա, նաև համոզված եմ, որ ոչինչ չի փոխվելու, քանի որ մենք անընդհատ խոսում ենք, բայց այդպես էլ սայլը տեղից չի շարժվում»,- նշեց նա: