Google-ը խոստովանել է Android-ի օգտատերերին մշտապես հետևելու մասին.Tert.am
22-11-2017 17:55:06 | Հայաստան | Ի՞նչ է գրում մամուլը
Tert.am. Android օպերացիոն համակարգով աշխատող սմարթֆոնները մշտապես հավաքում են օգտատերերի գտնվելու վայրի մասին տվյալները՝ նույնիսկ տվյալների փոխանցման գործառույթն անջատելու դեպքում: Այս մասին Google-ը հայտնել է Quartz-ին:
Աղբյուրի հաղորդմամբ՝ Google-ը սկսել է շարունակաբար հավաքել Android-ի օգտատերերի աշխարհագրական դիրքի մասին տեղեկությունները 2017 թվականի հունվարից: Օգտատերերի գտնվելու վայրը որոշվել է բջջային կապի մոտակա աշտարակներից հեռավորությամբ և աշխատել նույնիսկ աշխարհագրական դիրքի որոշման ծառայությունն անջատելու և սիմ քարտի բացակայության դեպքում:
Quartz-ը մանրամասնում է, որ սմարթֆոնը Google-ին փոխանցում է գտնվելու վայրի մասին տեղեկություններն ամեն անգամ, երբ օգտատերն անցնում է այլ բազային կայարանի տարածք կամ միացնում է Wi-Fi-ը և GPS-ը:
Google-ի ներկայացուցչի խոսքով՝ ընկերությունն օգտագործել է բջջային կապի ինդիկատորը սմարթֆոնին ծանուցումներ և հաղորդագրություններ ուղարկելու համար: Ընդ որում, կորպորացիան չի պահել այդ տվյալները և այժմ պատրաստվում է անջատել այս գործառույթը: