Գագիկ Ծառուկյանն Արցախում զորամաս է կառուցելու (Ֆոտո)
23-11-2017 17:35:02 | Հայաստան | Մամլո հաղորդագրություն
Գագիկ Ծառուկյանն Արցախում զորամաս է կառուցելու։
Նա հայտարարություն է տարածել, որում ասվում է. «Այսօր կայանալու է «Հայաստան» համահայկական հիմնադրամի ամենամյա դրամահավաքը: Այն իրապես մեծ նշանակություն ունի Արցախի եւ նրա ժողովրդի համար:
Յուրաքանչյուր տարի ես եւս իմ ֆինանսական մեծ ներդրումն եմ ունեցել կարեւորագույն այս գործում: Ես Արցախի ու նրա ժողովրդի հանդեպ առանձնահատուկ վերաբերմունք ունեմ, նրանք շատ թանկ են ինձ համար եւ հենց դա է պատճառը, որ Արցախում իմ կողմից իրականացվող աշխատանքները շարունակական են՝ վերաբնակեցված համայնքների բնակիչներին դրամական աջակցություն, գյուղտեխնիկայի եւ մեքենաների նվիրատվություն, Արցախի սոցիալ-տնտեսական զարգացմանն ուղղված բազմաթիվ ծրագրերի իրականացման համար անհրաժեշտ խոշոր գումարների նվիրատվություն: Իսկ այս անգամ ես որոշել եմ, հանուն Արցախի եւ նրա անվտանգության, հանդես գալ եւս մեկ խոշորածավալ նախաձեռնությամբ:
Իմ միջոցներով Արցախում կառուցվելու է միանգամայն նոր, բոլոր անհրաժեշտ պայմաններով ապահովված զորամաս, քանի որ այսօր մեզանից յուրաքանչյուրի գերնպատակն ու գերխնդիրը պետք է լինի Արցախի անվտանգության ամրապնդումն ու խաղաղության ապահովումը: Այս զորամասի կառուցման հողային աշխատանքներն արդեն իսկ ընթացքի մեջ են, իսկ հիմնական շինարարարությունը մեկնարկելու է գարնանը: Ապահովվելու է նաեւ այդ զորամասի մշտական ջրամատակարարումը: Կարծում եմ, յուրաքանչյուրն իր գործով պետք է ապացուցի Արցախի հանդեպ ունեցած սերը: Եվ ուրեմն հանուն մեր բոլորի Արցախի՝ անենք հնարավոր ամեն բան հայկական երկրորդ պետության բարօրության եւ անվտանգության համար»,- նշել է Ծառուկյանը։
ՀԱՅԵՐԵՆ
Русский
English
Դաս. հայերեն
French
