Գործարար միջավայրի վերաբերյալ ՀՀ հարկային օրենսգրքում կատարված փոփոխություններից օգտվելը բխում է ձեռնարկատերերի շահերից
28-11-2017 18:35:22 | Հայաստան | Տնտեսություն
Գործարար միջավայրին վերաբերող ՀՀ հարկային օրենսգրքում կատարված փոփոխությունների մասին օր առաջ իմանալը բխում է ձեռնարկատերերի շահերից:
Այս մասին նոյեմբերի 28-ին Երևանում կայացած Հայաստան-Իրան գործարար համաժողովի ժամանակ հայտարարեց ՀՀ պետական եկամուտների կոմիտեի Հարկային մեթոդաբանության վարչության ղեկավար Արման Պողոսյանը՝ կոչ անելով իրանցի գործարարներին ուսումնասիրել և ակտիվորեն օգտվել 2018 թվականից ուժի մեջ մտնող Հարկային նոր օրենսգրքի ընձեռած հնարավորություններից:
Ըստ նրա՝ ՀՀ-ն նոր քայլեր է կատարում կարևոր միջանցիք միջավայր դառնալու համար իրանցի գործարարների համար:
«Հարկային օրենսգրքի մշակման հիմնական նպատակադրումներից մեկը եղել է ՀՀ գործարար միջավայրի բարելավումը, օտարերկրյա ներդրումների համար առավել նպաստավոր միջավայրի ձևավորումը և, առհասարակ, ավելի կայուն ու կանխատեսելի հարկային միջավայրի ապահովումը, որտեղ օտարերկրյա կապիտալն իրեն կարող է զգալ ավելի երաշխավորված ու հարմարավետ»,- ընդգծեց Ա. Պողոսյանը:
Վերջինիս փոխանցմամբ՝ նոր կարգավորումներով տրվում են այնպիսի լուծումներ, որոնք գործարարներին հնարավորություն են տալիս, մասնավորապես, արտահանման գործարքները կազմակերպել ավելի նպաստավոր միջավայրում և հնարավորություն ունենալ լուծել արտահանող ընկերություններին հետաքրքրող ամենակարևոր խնդիրը՝ ԱԱՀ-ի կարճ ժամկետներում պարզեցված ընթացակարգերով վերադարձնելու խնդիրը:
ՊԵԿ Հարկային մեթոդաբանության վարչության ղեկավարի խոսքերով՝ այս առումով երկու հիմնական քայլեր են կատարվել. Առաջին՝ հնարավորություն է ստեղծվել, որպեսզի մինչև 20 մլն դրամ մեծությամբ ԱԱՀ բեռի վերադարձի գործընթացը կազմակերպվի ներկայումս սահմանված 90 օրվա փոխարեն 4 օրում, եթե հարկ վճարողը չի բնութագրվում որպես ռիսկային հարկ վճարող:
«Սա կարծում եմ շատ կարևոր և առաջադեմ քայլ է, որը չեն արել անգամ զարգացած հարկային համակարգ ունեցող երկրները»,- նկատեց Ա. Պողոսյանը՝ հավելելով, որ ՀՀ կառավարությունը կարևորելով արտահանության աջակցությունը՝ գնացել է այդ քայլին, որից պետք է օգտվեն օտարերկրյա գործարարները:
Ըստ նրա՝ ՀՀ հարկային համակարգում առաջին անգամ հնարավորություն է ընձեռնվում ԱԱՀ-ի մնացորդային գումարները վերադարձնել ոչ միայն արտահանողներին, այլև երկրի ներքին տարածքում գործունեություն իրականացնողներին:
Ա. Պողոսյանի գնահատմամբ՝ սա ևս աննախադեպ և շատ կարևոր քայլ է, որն ուղղված է ձեռնարկատերերի շրջանառու միջոցների համալրման խնդրի լուծմանը: