«Երկիր Ծիրանի» կուսակցությունը կոչ է անում ինքնակազմակերպման և հայրենիքում արդար կարգերի հաստատման
12-12-2017 17:04:11 | Հայաստան | Հասարակություն
2017 թվականի դեկտեմբերի 11-ին «Երկիր Ծիրանի» կուսակցության կանանց խորհուրդն ի պատասխան Հայաստանում գործող ավտորիտար համակարգը ներկայացնող ՀՀԿ-ի կողմից արված հրապարակավ ցինիկ հայտարարությունների և առաջին անհրաժեշտության սննդամթերքի թանկացման հետ կապված թոշակների և աշխատավարձերի չինդեքսավորմանն (չբարձացմանը) կազմակերպել էր բողոքի ակցիա: Բողոքի ակցիայի նպատակն էր մերժել բթացած անասնական վարքագծի դրսևորումը և հանցավոր անգործության դատապարտումը:
Ակցիան տեղի ունեցավ ՀՀԿ գրասենյակի առջև: Շուրջ հարյուր ոստիկան շրջափակել էին ՀՀԿ գրասենյակը և թույլ չտվեցին արածելու և որոճալու համար նախատեսված մթերքը փոխանցել հասցեատերերին:
ՀՀԿ անդամների կողմից հրապարակային հայտարարությունները և դրսևորած անգործությունը, կապված մարդու սննդակարգի համար նախատեսված նվազագույն անհրաժեշտ մթերքների աննախադեպ թանկացման պայմաններում մարդկանց թոշակների և աշխատավարձերի չինդեքսավորելը (չբարձացնելը) և դրա հիմնավորելը, որ սոցիալապես անապահով խավը միևնույն է օգտագործում է միայն կարտոֆիլ, որը չի թանկացել, խախտում է մարդու իրավունքներն ու ազատություններն ուղղակի և անուղղակի ձևով հանդիսանալով քրեորեն հետապնդելի արարք՝ մարդու իրավահավասարության խախտում: Արգելվում է կախված սոցիալական ծագումից, գույքային վիճակից, անձնական կամ սոցիալական բնույթի այլ հանգամանքներից մարդու իրավունքներին ու օրինական շահերին պատճառել վնաս:
Նման վարքագծի դրսևորումը իհարկե նորություն չէ: Նորություն չէ նաև մեր հանրության հանդուրժելու ունակությունը շարունակական անարդարություններին և ապօրինություններին: Բայց ժամանակն է սթափվել և ոտքի կանգնել՝ չհանդուրժելով անարդարությանն և ապօրինությանը: Առաջին հերթին ոտքի պետք է ելնի սոցիալապես անապահով խավը և անհնազանդության միջոցով տապալի հանցավոր համակարգը:
«Երկիր Ծիրանի» կուսակցությունը կոչ է անում ինքնակազմակերպվել և ինքնաազատագրման միջոցով հասնել բաղձալի նպատակին՝ հաստատել արդար կարգեր հայրենիքում:
«Երկիր Ծիրանի» կուսակցության լրատվական ծառայություն
ՀԱՅԵՐԵՆ
Русский
English
Դաս. հայերեն
French
