Ներդրումների առումով կառավարությունը տապալել է իր գործունեությունը. Խոստացված 850 մլն դոլարի ներդրումներն ուղղակի չեն կատարվել (տեսանյութ)
15-12-2017 17:17:37 | Հայաստան | Հասարակություն
Ներդրումների առումով կառավարությունը տապալել է իր գործունեությունը, քանի որ խոստացված 850 մլն դոլարի ներդրումներն ուղղակի չեն կատարվել:
Այս մասին դեկտեմբերի 15-ին լրագրողների հետ հանդիպման ժամանակ նշեց տնտեսագետ Լևոն Թումանյանը՝ ամփոփելով 2017 թվականը:
Ըստ նրա՝ իրական ներդրումներ կատարելու փոխարեն պատկան մարմինները վարկեր են վերցնում՝ դրանք ներկայացնելով որպես ներդրում:
Լ. Թումանյանի փոխանցմամբ՝ պետական պարտքը նախատեսվածից ավելի է աճել և դեկտեմբերի 1-ի դրությամբ կազմում է 6 մլրդ 404 մլն ԱՄՆ դոլար:
«Հայաստանը գտնվում է ռիսկային գոտում, իսկ կապիտալը ռիսկային գոտի չի սիրում: Եթե մենք ուզում ենք իսկապես տնտեսություն զարգացնել և արտագաղթը կանխել, ապա արտակարգ միջոցներ պետք է ձեռք առնվեն»,- ընդգծեց տնտեսագետը՝ հավելելով, որ նախևառաջ պետք է իրական բարեփոխումներ կատարվեն կառավարման ոլորտում:
Նրա խոսքերով՝ պետական պարտքի ավելացումը չի կարող շատ վտանգավոր լինել, եթե տնտեսությունն իսկապես զարգացում է ապրում:
Լ. Թումանյանի գնահատմամբ՝ դեռևս Հայաստանը կարողանում է նորմալ ձևով կառավարել պետական պարտքը:
«Առայժմ որևէ պրոբլեմ չի առաջացել, բայց ես կարծում եմ, որ պրոբլեմները նոր են սկսվելու, որովհետև առաջիկայում մենք բավականին մեծ միջոցներ պետք է ետ վերադարձնենք այդ վարկերից, և ես չգիտեմ, թե ինչպես է դա կատարվելու»,- նկատեց բանախոսը:
Անդրադառնալով կառավարության կողմից չկատարված մյուս խոստումներին՝ Լ. Թումանյանն առանձնացրեց համայնքների խոշորացման հետ կապված խնդիրները:
Նա, մասնավորապես, նշեց. «Հանրապետությունում մոտ ապագայում 100-ից ավելի գյուղեր պարզապես գոյություն չեն ունենա: Ի սկզբանե որոշակի չափորոշիչներ էին մշակված համայնքների խոշորացումն իրականացնելու համար, սակայն դրանք չպահպանվեցին: Բացի այդ, կառավարության այն խոստումները, որ պետք է ապահովեր ենթակառուցվածքների որոշակի մակարդակ, նույնպես չարվեցին: Մի շարք համայնքներ նախկին խորհրդային շրջանների մակարդակով միավորվեցին, ինչը փոքրիկ Հայաստանի դեպքում պարզապես անթույլատրելի է»:
ՀԱՅԵՐԵՆ
Русский
English
Դաս. հայերեն
French
