Բաթումում մեկնարկել է գինու և պանրի փառատոնը․tert.am
27-12-2017 16:29:16 | Վրաստան | Ի՞նչ է գրում մամուլը
tert.am․ Դեկտեմբերի 26-ին Բաթումում ամանորյա միջոցառումների շրջանակում մեկնարկել է գինու և պանրի փառատոնը, որը կազմակերպել է Աջարիայի գյուղատնտեսության նախարարությունը: Եվրոպայի հրապարակում ներկայացվել է Վրաստանի տարբեր շրջանների ֆերմերական և կոոպերատիվ տնտեսություններում պատրաստված արտադրանքը:
Ինչպես նշում է apsny.ge-ն, նախատոնական Բաթումի բնակիչներն ու հյուրերը կարող են փորձել և ձեռք բերել ավանդական բաղադրատոմսերով պատրաստված վրացական գինի և պանիր:
Աղբյուրի հաղորդմամբ՝ փառատոնին ներկա են եղել Աջարիայի կառավարության ղեկավար Զուրաբ Պատարաձեն, Բաթումի քաղաքապետ Լաշա Կոմախիձեն, Աջարիայի գյուղատնտեսության նախարար Ավթանդիլ Մեսխիձեն, ինչպես նաև՝ գործադիր և օրենսդիր իշխանությունների ներկայացուցիչներ:
Աջարիայի կառավարության ղեկավարը պարգևատրել է լավագույն ձեռներեցներին ոսկե, արծաթե և բրոնզե մեդալներով: Միջոցառումն ուղեկցվել է երաժշտական ելույթներով:
Նշվում է, որ գինու և պանրի փառատոնը կշարունակվի երկու օր: Եվրոպայի հրապարակում փառատոնին զուգընթաց անցկացվում են ամանորյա միջոցառումներ: