Դաժան հարված Վովա Գասպարյանին ու մյուս իրավապահներին, նոր տարվա մեկնարկին
08-01-2018 15:36:50 | Հայաստան | Իրավունք
Հունվարի 8-ին, ժամը 04:13-ին ողբերգական վթար է տեղի ունեցել Երեւանի Աբովյան փողոցի եւ Սայաթ-Նովայի պողոտայի խաչմերուկում: BMW X6 մեքենան բախվել է ոստիկանական մեքենային, որի հետեւանքով մահացել է ՃՈ աշխատակիցը, մյուս աշխատակիցը ծայրահեղ ծանր վիճակում է: Մահացածը նոր էր երեխա ունեցել:
Shamshyan.com-ը հայտնում է, որ BMW X 6-ի վարորդը դեպքի վայրից դիմել է փախուստի: Մեքենայի մեջ հայտնաբերվել են մի քանի համարանիշներ՝ հայկական եւ ռուսական, իսկ այն վարել է բազմաթիվ ավտովթարների հեղինակ, քրեական բազմաթիվ պատմություններով հայտնի «Ճվճըվ Արոյի» որդին՝ «Սաքուլիկ» մականվամբ Սարգիս Վարդանյանը:
Քրեական հեղինակություն համարվող Ճվճըվ Արոն ժամանակին եղել է Երեւանի ավագանու անդամ եւ մահացել է անցյալ տարի: Թե նա, թե իր որդիները վերջին տարիներին, ըստ մամուլի հրապարակումների ու ոստիկանական հաղորդագրությունների, բազմաթիվ պատմությունների մեջ են հայտնվել՝ վթարներ, կրակոցներ եւ այլն, որոնց հետեւանքով տուժել են բազմաթիվ քաղաքացիներ: «Սաքուլիկը» նույնիսկ ժամանակին զրկվել է վարորդական իրավունքից, անցել է տարբեր քրեական գործերով:
Բայց նա ազատության մեջ է, շարունակում է վարել մեքենաներ ու հայտնվել ողբերգական միջադեպերի մեջ, որի հետեւանքով շարունակում են տուժել քաղաքացիներ:
Եվ ահա, իրավապահների, արդարադատության թողտվության, անպատժելիության հետեւանքով նոր տարվա առաջին աշխատանքային օրը տեղի է ունենում այս միջադեպը, եւ զարհուրելի խորհրդանշականությամբ՝ զոհը ոստիկանության աշխատակից է:
ՀԱՅԵՐԵՆ
Русский
English
Դաս. հայերեն
French
