Սարգիս Հացպանյանը պարգևատրվել է Հրանդ Դինքի անվան շքանշանով
19-01-2018 16:26:14 | Ֆրանսիա | Հասարակություն
Այս տարի Հրանդ Դինքի անվան շքանշանը շնորհվել է արցախյան պատերազմի մասնակից, ազատամարտիկ, տարածաշրջանային հարցերով փորձագետ, հրապարակախոս, հայրենիքում և սփյուռքում մեծ ճանաչում ձեռք բերած Սարգիս Հացպանյանին։
Պարգեւատրումը կատարել է Լոս Անջելեսի Պոլսահայ Միության ատենապետ Տքթ. Մարգ Քէոշկէրը, ով Միացյալ Նահանգներից հատուկ ժամանել էր Ֆրանսիայի Լիոն քաղաք, որի կլինիկաներից մեկում այժմ բուժման մեջ է գտնվում Սարգիս Հացպանյանը։
Թուրքիայում սպանված «Ակօս» թերթի գլխավոր խմբագիր, լրագրող Հրանդ Դինքի անվան շքանշանը 3 տարի շարունակ հունվար ամսին Լոս Անջելեսի Պոլսահայ Միության կազմակերպած միջոցառումների ժամանակ տրվում է այն մարդկանց, ովքեր Հրանդ Դինքի գաղափարակիցներն են և իրենց գործունեությամբ ու ելույթներով պաշտպանում են Հայոց ցեղասպանության ճանաչման հարցը:
Հունվարի 11-ին Լիոնում անցկացված այս միջոցառմանը մասնակցում էին բազմաթիվ հյուրեր, այդ թվում Տքթ. Հակոբ Էքմեքճին Պոլիսից, Պր. Ժիրայր Քարակոզը Փարիզից, Պր. Հակոբ Արտըչը Գերմանիայից և այլ համակիրներ:
Ներկաների կողմից անդրադարձ կատարվեց Սարգիս Հացպանյանի կատարած հայանպաստ գործունեությանը, նշվեց, որ նա ոչ միայն նվիրված է հայ ազգին ու Հայաստանին, այլ իր կյանքի պայմանները զոհաբերել է նաև Հայրենիքի բարելավմանը։
Նախորդ երկու տարիներին Հրանդ Դինքի անվան շքանշանը տրվել է Խաչիկ Մուրատյանին, Թամեր Աքչամին եւ Արիս Նալճըյին, ովքեր Սարգիս Հացպանյանի նման հրապարակախոս, լրագրող կամ պատմաբան են:
Սարգիս Հացպանյանի առողջական վիճակը թույլ չտվեց պարգեւատրումը անկացնել Լոս Անջելեսում, սակայն հունվարի 20-ին Հրանդ Դինքի հիշատակին կազմակերպված միջոցառմանը կցուցադրվի նաեւ Սարգիս Հացպանյանի և նրան պարգևատրելու արարողության վերաբերյալ տեսանյութ, ելույթ կունենան պատմաբաններ եւ մամուլի ներկայացուցիչներ։
ՀԱՅԵՐԵՆ
Русский
English
Դաս. հայերեն
French
