Չենք պատրաստվում ենթարկվել ոչ դատավորների, ոչ էլ դատախազության կամքին. Փաստաբանները պայքարելու են մինչև վերջ (տեսանյութ)
19-01-2018 17:32:44 | Հայաստան | Իրավունք
Չենք պատրաստվում ենթարկվել ոչ դատավորների, ոչ էլ դատախազության կամքին. Փաստաբանությունն ինքնին անկախ ինստիտուտ է, և մենք պայքարում ենք այդ ինստիտուտի ազատականացման համար:
Նման հայտարարությամբ հունվարի 19-ին լրագրողների հետ հանդիպման ժամանակ հանդես եկան որոշ փաստաբաններ:
Ըստ փաստաբան Գրիշա Բալասանյանի՝ փորձ է արվում դատական նիստերի դահլիճում փաստաբաններին դարձնել զուտ սիմվոլ, որն իր ֆիզիկական ներկայությամբ կօրինականցնի ապօրինի դատական նիստերը:
Նրա խոսքերով՝ հատկապես վերջին դատական նիստերի ընթացքում կոպտագույն խախտումներ են տեղի ունեցել, որոնք սրում են պայմանագրային և հանրային պաշտպանների հարաբերությունները՝ միաժամանակ հեղինակազրկելով հանրային պաշտպանի գրասենյակը:
«Օրենքի տառին հակառակ դատարանները փորձ են անում զուգահեռ դատական պրոցեսում ներգրավել և հանրային, և պայմանագրային պաշտպանների. Թող ինձ ներեն իմ գործընկերները, բայց փորձ են անում հանրային պաշտպանին վերաբերել որպես պահեստային պաշտպանի: Այդպիսով ոտնատակ են անում ոչ միայն այդ ինստիտուտի հեղինակությունը, այլ ընդհանրապես ոտնահարում են ամբաստանյալի՝ իր կամքով ազատ պաշտպան ընտրելու իրավունքը»,- նշեց Գ. Բալասանյանը` շեշտելով, որ փորձ է արվում խաչ քաշել արդարադատության վրա:
Իր հերթին Հանրային պաշտպանի գրասենյակի փաստաբան Մարինե Ֆարմանյանը նշեց, որ դատարանների ապօրինի գործողությունների հետ կապված հանրային պաշտպանի գրասենյակը բազմիցս բողոքներ է ներկայացրել և վիճարկել այն դրույթները, որ օրենքի մեջ երկու մրցակցող ինստիտուտներ կան:
«Կոնկրետ «Սասնա ծռերի» գործով դատական նիստի ընթացքում հանրային պաշտպան Անուշ Մխիթարյանը շատ հիմնավոր, պատճառաբանված և նույնիսկ կոշտ միջնորդություն ներկայացրեց, որ դատարանը դադարեցնի իր լիազորությունները. Այսինքն՝ ինքը որպես հանրային պաշտպան ներկայացած անձ, պահանջում էր դատարանից և բավականին երկար կռիվ տվեց, որպեսզի դատարանը դադարեցնի իր լիազորությունները, քանի որ տվյալ անձինք հրաժարվել էին իր պաշտպանությունից և հայտարարել էին, որ ունեն իրենց պաշտպանները, սակայն դատարանը պահպանեց հանրային պաշտպանի լիազորությունները, ինչը պատրաստվում ենք բողոքարկել»,- փաստեց բանախոսը:
Իսկ ահա փաստաբան Տիգրան Հայրապետյանը նկատեց, որ Հայաստանում բացի փաստաբաններից, պաշտպանության կարիք ունեն և համապատասխան օրենքը, և արդարադատությունը:
Նրա պնդմամբ՝ դատարաններն ուղղակի անտեսում են օրենքը՝ փորձելով հեղինակազրկել պաշտպանի օգտակարությունը, փաստաբանական ինստիտուտը:
ՀԱՅԵՐԵՆ
Русский
English
Դաս. հայերեն
French
