Հունվարի 23-ին Գեղարքունիքի մարզում գործող ավելի քան 20 քաղհասարակության կազմակերպությունների (ՔՀԿ) ներկայացուցիչներ ծանոթացան օրենսդրական որոշ նրբությունների, որոնք վերաբերում են ՀԿ-ների ձեռնարկատիրական գործունեությամբ զբաղվելու նոր հնարավորությանը։
Դասընթացը կազմակերպվել է Եվրամիության կողմից ֆինանսավորող «Կառուցողական երկխոսության հանձնառություն» ծրագրի շրջանակում։ Ծրագրի Բիզնեսի և հարակից ոլորտների համակարգող, ՓՄՁ համագործակցության ասոցիացիայի գործադիր տնօրեն Հակոբ Ավագյանը նշեց, որ այն ուղղված է քաղհասարակության կազմակերպությունների ազդեցիկության բարձրացմանը՝ հանրային քաղաքականությունների մշակման հարցում։
Հակոբ Ավագյանը ներկայացրեց սոցիալական ձեռնարակատիրության օրենսդրական խնդիրները. «Հասարակական կազմակերպությունների մասին» նոր օրենքի ընդունումից հետո շատ ՀԿ-ներ ցանկություն են ունենում ձեռնարկատիրական գործունեությամբ զբաղվել, սակայն մի շարք խնդիրների են բախվում, երբ անհրաժեշտ է լինում անցնել որևէ հարկման ռեժիմի։ Մասնակիցների համար տարբեր օրինակներով, հարցուպատասխանի միջոցով ներկայացվեցին, թե որ գործունեությունը կարող է համարվել ձեռնարկատիրական։
Նա մասնակիցներին խորհուրդ տվեց ստեղծել առանձին առևտրային ընկերություն, վարել առանցնացված հաշվապահություն, քանի դեռ պետության կողմից հստակեցումներ մտցված չեն, թե ՀԿ-ի որ եկամուտն է համարվելու ձեռնարկատիրությունից ստացված, որ ծախսն է համարվելու ձեռնարակատիրության ուղղված եղել և թե որ եկամուտը ինչ ռեժիմով է հարկվելու.
«Մենք փորձում ենք մեր տարածաշրջանում տեղեկատվական տեխնոլոգիաների ոլորտը զարգացնել: Հետաքրքիր է, եթե մենք ձեռնարկատիրական գործունեությամբ զբաղվենք, ի՞նչ կերպ պետք է հարկվենք։ Դասընթացում ինձ համար նոր տեղեկություններ կային, հետաքրքիր էր, և արժե, որ նորից լինեն նման հանդիպումներ»,-իր խոսքում նշեց դասընթացի մասնակից «ITM ինովացիոն կենտրոնի» ներկայացուցիչ Սարգիս Կիևյանը։
Արամ Վարդանյանը, ով «Հույսի ձեռք» ՀԿ հիմնադիր նախագահն է նշեց, որ նման դասընթացները արդյունավետ են քաղհասարկության կազմակերպությունների աշխատանքների բարելավման համար․ «Հարկային օրենսդրությունը միշտ փոփոխվում է, բոլորն ունեն նորություններն իմանալու կարիքը։ Շատ փոփոխությունների մասին մենք չենք իմանում։ Նման դասընթացները կարևոր են նրանով, որ բոլորը ճիշտ ներկայացնեն իրենց հաշվետվությունները և խուսափեն բարդություններից»,-նշեց նա։
Դասընթացի ավարտից հետո Հակոբ Ավագյանը առանձին խորհրդատավություն տրամադրեց մասնակիցներին։
ՀԱՅԵՐԵՆ
Русский
English
Դաս. հայերեն
French
