Այսօր պատանեկան տարիքի ընթերցողների համար գրականություն ստեղծելու խնդիր ունենք. Էդվարդ Միլիտոնյան

Գիրք նվիրելու օրվան ընդառաջ լրագրողների հետ կայացած ավանդական հանդիպման ընթացքում ՀԳՄ-ի միջոցառումները լուսաբանած լրատվամիջոցները պարգևատրվեցին պատվոգրերով

16-02-2018 16:50:18   | Հայաստան  |  Գրական էջ
 

Մենք այսօր պատանեկան տարիքի ընթերցողների համար գրականություն ստեղծելու խնդիր ունենք: 
 
Այս մասին փետրվարի 16-ին՝ Գիրք նվիրելու օրվան ընդառաջ լրագրողների հետ հանդիպման ժամանակ հայտարարեց Հայաստանի Գրողների միության (ՀԳՄ) նախագահ Էդվարդ Միլիտոնյանը: 
 
Ըստ նրա, այդուհանդերձ, վերջին մի քանի տարիների ընթացքում հատկապես լրագրողներն այլևս չեն հարցնում, թե արդյո՞ք Հայաստանում կա ժամանակակից գրականություն: 
 
«Ես կարծում եմ, որ և՛ մենք, և՛ լրագրողները, ինչ-որ չափով ավելի սթափ ենք սկսել նայել մեր այսօրվա կյանքում հրատարակվող գրականությանը, թարգմանությանը, դրամատուրգիային և այլ ասպարեզի գրականությանը: Մի բան լավ իմացեք, որ դարն էլ լինի, միևնույն է, հայ ժողովուրդը մեծ գրականություն է ունենալու»,- ընդգծեց Է. Միլիտոնյանը: 
 
Վերջինիս խոսքերով՝ չնայած համակարգիչների և պլանշետների գոյությանը, այնուամենայնիվ, դրական փոփոխություն է նկատվում գրքերի սպառման և ընթերցանության ոլորտում: 
 
ՀԳՄ ղեկավարը դեմ չէ, որպեսզի մարդիկ ժամանակակից տեխնոլոգիաների օգտագործմամբ գրքեր ընթերցեն, քանի որ կարևորում է ընթերցանությունը և գրականությանն այդպիսով մոտ լինելը: 
 
Անդրադառնալով Գիրք նվիրելու օրվան՝ Է. Միլիտոնյանը, մասնավորապես, նշեց. «Արդեն 10 տարուց ավելի է, ինչ ՀԳՄ-ն առաջարկել է Հովհաննես Թումանյանի ծննդյան օրը՝ ի հիշատակ նրա մեծ գործի, նշել որպես գիրք նվիրելու օր: 90-ականներին, երբ կյանքը, կենցաղը այլ կերպ էին, հանրությունը փոքր-ինչ կտրվել էր գրքերից, սակայն Թումանյանի ծննդյան օրը դարձավ հանրապետական բնույթի հրաշալի տոն: Սկզբնական շրջանում մեծ տարածում չգտավ տոնը, սակայն հետո հասկացան, որ գրքի հանդեպ հայացքը շեշտակի փոխելու ժամանակն է»: 
 
Է. Միլիտոնյանը նաև տեղեկացրեց, որ ընթերցանությունը խթանելու նպատակով ՀԳՄ-ը 2017 թվականին շուրջ 200 գրական միջոցառում է կազմակերպել, ներառյալ գրական հանդիպումներ, շնորհանդեսներ, ընթերցումներ, գրքերի քննարկումներ:
 
Ինչպես նախորդ տարիներին, այս տարի ևս ՀԳՄ անդամները գրական հանդիպումներ կունենան մարզերի և մայրաքաղաքի ընթերցասերների հետ: 
«Գրողների միությունը ՀՀ կրթության և գիտության նախարարության և Երևանի քաղաքապետարանի կրթության վարչության հետ հանդիպումներ է պատրաստել մայրաքաղաքի թիվ 32 հիմնական դպրոցում: Փետրվարի 19-ին աշակերտների հետ կհանդիպեն անվանի գրողներ, գրականագետներ, թարգմանիչներ»,-նշեց Է. Միլիտոնյանը՝ տեղեկացնելով, որ անձամբ ինքն այցելելու է Ստեփան Զորյանի անվան թիվ 56 դպրոց: 
 
Նշենք, որ նույն օրը ՀԳՄ-ի մասնակցությամբ Խնկո-Ապոր անվան ազգային մանկական գրադարանում կբացվի մանկական գրքի ցուցահանդես:
 
Լրագրողների հետ ավանդական դարձած հանդիպման ընթացքում կլոր տարին ՀԳՄ-ի միջոցառումները լուսաբանած լրատվամիջոցները, այդ թվում «Նոյյան Տապան» լրատվական գործակալությունը, պարգևատրվեցին պատվոգրերով: 
 
 
 
 
 
 
Էլիզա Զախարյան, «Նոյյան Տապան» 
Նոյյան տապան   -   Գրական էջ
Լուրեր Հայաստանից եւ Սփյուռքից

Կարդացել են 913 անգամ



Բաժանորդագրվեք «Նոյյան Տապան»-ի մեր էջերին
«Յութուբում», «Ֆեյսբուքում» Եւ «Թվիթերում»` մեր հաղորդումներն անվճար դիտելու համար
 
Noyan Tapan - Նոյյան տապան
Facebook Group · 3 365 անդամ
Միանալ խմբին
Միացեք մեր «Ֆեյսբուքյան» խմբին՝ մեր հաղորդումները քննարկելու եւ բանախոսներին հարցեր ուղղելու համար