Իրանը պատրաստ է ավելացնել Հայաստան արտահանվող գազի ծավալները
27-02-2018 14:46:14 | Հայաստան | Հասարակություն
Իրանի Իսլամական Հանրապետությունը (ԻԻՀ) պատրաստ է ավելացնել Հայաստան արտահանվող գազի ծավալները:
Ինչպես լրագրողների հետ զրույցում տեղեկացրեց ԻԻՀ էներգետիկայի նախարար Ռեզա Արդաքանիանը, մոտ ապագայում Իրանը և Հայաստանը բանակցություններ կվարեն գազի և էլեկտրաէներգիայի փոխանակման ծրագրի շուրջ:
Ըստ նրա՝ նշյալ բանակցություններին Իրանից կմասնակցի նավթի նախարարությունը, իսկ Հայաստանից՝ էներգետիկայի և բնական պաշարների նախարարությունը:
«80 միլիոն բնակչությամբ Իրանը Հայաստանը դիտարկում է որպես պատուհան դեպի ԵԱՏՄ 180 միլիոնանոց շուկա, և անշուշտ, երկու երկրների ժողովուրդների սպասելիքները միջկառավարական նիստերից հետևյալն են, որպեսզի հնարավորություն ընձեռնվի այս նիստերը լավագույնս օգտագործել երկկողմ հարաբերությունները զարգացնելու համար»,- նշեց Ռ. Արդաքանիանը:
Վերջինիս խոսքերով՝ Հայաստանը և Իրանն իրենց աջակցությունը պետք է ցուցաբերեն նաև մասնավոր հատվածի համագործակցությունը զարգացնելու ուղղությամբ:
Իրանցի նախարարի կարծիքով՝ բարենպաստ պայմաններ են ստեղծվել երկու երկրների միջև առևտրատնտեսական, գյուղատնտեսական, մաքսային և հանքարդյունաբերության ոլորտներում համագործակցության, ինչպես նաև ավտոմոբիլային միջանցքի ստեղծման, երկաթգծի և օդային տարածքով կապերի սերտացման համար: