Արտաքին ձևավորման և գովազդի վարչությանը հանձնարարվել է գույքագրել մայրաքաղաքում թարմացման անհրաժեշտություն ունեցող ցուցանակները
20-03-2018 18:07:25 | Հայաստան | Մամլո հաղորդագրություն
Քաղաքապետարանում տեղի ունեցած աշխատանքային խորհրդակցության ժամանակ, որը վարել է Երևանի քաղաքապետ Տարոն Մարգարյանը, աշխատակազմի արտաքին ձևավորման և գովազդի վարչությանն ու վարչական շրջանների ղեկավարներին հանձնարարվել է գույքագրել մայրաքաղաքում առկա այն ցուցանակները, որոնք թարմացման կամ փոխարինման անհրաժեշտություն ունեն և, ըստ այդմ, համապատասխան քայլեր ձեռնարկել դրանք կարգաբերելու ուղղությամբ:
«Անընդունելի է այն անտարբերությունը, որ դրսևորվում է տեսքից ընկած կամ, որ ավելի վատ է, վնասված ու չվերականգնված ցուցանակների նկատմամբ: Ի վերջո նաև դրանց տեսքով են մարդիկ ու հատկապես մեր քաղաքի հյուրերը կարծիք կազմում Երևանի մասին: Եվ պետք չէ արդարանալ, թե դրանց մեծ մասը մասնավորի կողմից է տեղադրվել ու սպասարկվում: Անհրաժեշտ բոլոր լիազորությունները տրված են, որ անբարեխիղճ տնտեսվարողին պարտադրեք պատշաճ կատարել իր պարտավորությունները: Կարճ ժամկետում գույքագրեք և կարգի բերեք ամեն ինչ», - ընդգծել է Տարոն Մարգարյանը:
ՀԱՅԵՐԵՆ
Русский
English
Դաս. հայերեն
French
