4000 սմ ռեկորդային երկարությամբ պատրաստված գաթան իր յուրահատուկ համով գերեց ոչ միայն երևանցիներին, այլև զբոսաշրջիկներին (ֆոտոշարք)
21-03-2018 17:14:57 | Հայաստան | Հասարակություն
4000 սմ երկարություն և 40 սմ լայնություն ունեցող աշխարհի ամենաերկար գաթան՝ պատրաստված ոչ ավանդական բաղադրատոմսով, այսօր մատուցվեց երևանցիներին և մայրաքաղաք այցելած հյուրերին:
Ռեկորդային երկարություն ունեցող գաթայի համտես-հյուրասիրությունը նախաձեռնել էր «Երեմյան Փրոջեքթս» ընկերությունը՝ նվիրված «Պանդոկ Երևանի» Տերյան մասնաճյուղի 4-ամյակին:
Ինչպես լրագրողների հետ զրույցում տեղեկացրեց «Երեմյան Փրոջեքթս»-ի շեֆ-հրուշակագործ Անահիտ Միքայելյանը, յուրահատուկ բաղադրատոմսով պատրաստված գաթան թխվել է 2 օրում՝ 3 հրուշակագործների մասնակցությամբ: Այն պատրաստելու համար պահանջվել է 55 կգ ալյուր, 20 կգ շաքարավազ, 75 կգ կարագ, 25 կգ նուշ, 300 ձու և 30 կգ հայկական չիր:
Կարևորելով ոչ մշակութային արժեքների պահպանումն ու տարածումը՝ «Երեմյան Փրոջեքթս»-ը հերթական նախաձեռնությամբ փորձեց երևանցիների և զբոսաշրջիկների համար ստեղծել յուրօրինակ միջոցառում՝ միաժամանակ ճանաչելի դարձնելով հայկական խոհանոցի ամենատարածված ու ծիսական աղանդերը՝ գաթան:
«Ազգային խոհանոցը ներկայացնելիս՝ մենք սովորաբար այն ներկայացնում ենք նորովի, և այս գաթան ևս բացառություն չէր: Ցանկացանք, որպեսզի մի քանի ժամ մայրաքաղաքն ուրախ տրամադրության մեջ լինի, նաև հետաքրքրացնենք երևանցիների և քաղաքի հյուրերի առօրյան»,- նշեց «Երեմյան Փրոջեքթս»-ի հասարակայնության հետ կապերի և մարքեթինգի բաժնի ղեկավար Անահիտ Գևորգյանը:
Վերջինիս խոսքերով՝ չնայած գաթան ռեկորդային երկարություն ունի, այդուհանդերձ, այն Գինեսի ռեկորդների գրքում գրանցելու մասին չեն մտածել:
Այս «համեղ» իրադարձությանը մասնակցեցին շուրջ 300 երևանցիներ, բազմաթիվ հյուրեր և զբոսաշրջիկներ, ովքեր մեծ ոգևորությամբ համտեսեցին և գնահատեցին հայկական խոհանոցի ամենասիրված աղանդերներից մեկը:
ՀԱՅԵՐԵՆ
Русский
English
Դաս. հայերեն
French
