Հայի գիտակցության մեջ պետք է մտցնել, որ Ռուսաստանի հետ դաշնակիցներ ենք, այլ ոչ նրա վասալը (տեսանյութ)
21-03-2018 15:22:27 | Հայաստան | Հասարակություն
Ընտրություններում բարձր ցուցանիշներով հաղթելն Արևմուտքում ընկալվում է որպես հետամնացության դրսևորում:
Այս մասին լրագրողների հետ հանդիպման ժամանակ նշեց քաղաքական գիտությունների դոկտոր, պրոֆեսոր, մանկավարժական համալսարանի քաղաքագիտության և իրավունքի պատմության ամբիոնի վարիչ Լևոն Շիրինյանը` անդրադառնալով ՌԴ-ում կայացած նախագահական ընտրություններին և դրանից բխող աշխարհաքաղաքական հետևանքներին:
Ըստ նրա՝ դեռևս 2007 թվականին ՌԴ նախագահ Վլադիմիր Պուտինը Մյունխենյան անվտանգության համաժողովի ընթացքում հայտարարել էր Ռուսաստանի՝ առանձին բևեռ դառնալու ձգտումների մասին, որն այսօր շարունակվում է:
«Ինչքանո՞վ կկարողանան սա հաջողեցնել. Ես այստեղ երկու հակասական տենդենց եմ ուզում տեսնել՝ այն երկիրը, որն ունի ռազմական պոտենցիալ և տնտեսական ոչ ակնառու հաջողություններ, գնում է միլիտարիզմի ճանապարհով: Ռուսաստանի պարագայում սա նորություն չի, ինչը քաղաքականության մեջ կբերի արկածախնդրության և վտանգավոր շարժերի»,- նշեց Լ. Շիրինյանը՝ շեշտելով, որ ՌԴ-ում ավտորիտար ռեժիմը գնալով ուժեղանում է:
Քաղաքագետը նկատեց, որ նշյալ համատեքստում Հայաստանը կարող է ոչ բարենպաստ դիրքում հայտնվել այն դեպքում, եթե Վաշինգտոնի կողմից Հարավային Կովկասը դիտվի որպես ռուսական ազդեցության գոտի:
Նրա խոսքերով՝ Արցախի Հանրապետության նախագահ Բակո Սահակյանին Միացյալ նահանգներում ցուցաբերված ընդունելությունից և Հայաստանի նկատմամբ Եվրամիության փոփոխվող վերաբերմունքից կարելի է ակնկալել, որ Հարավային Կովկասն, այնուամենայնիվ, որպես ռուսական ազդեցության գոտի չի դիտարկվի:
«Այստեղ մեր դերակատարությունն ու անվտանգությունը կմեծանա: Ունենք պատմական շանս առաջ շարժվելու, մեր հայրենիքը մեծացնելու, լավագույն պետություն ստեղծելու համար»,- ընդգծեց բանախոսը` շեշտելով. «Հայի գիտակցության մեջ պետք է մտցնել, որ Ռուսաստանի հետ դաշնակիցներ ենք, այլ ոչ նրա վասալը»:
ՀԱՅԵՐԵՆ
Русский
English
Դաս. հայերեն
French
