4000 սմ ռեկորդային երկարությամբ և ոչ ավանդական բաղադրատոմսով պատրաստված գաթան այսօր մատուցվեց երևանցիներին և մայրաքաղաք այցելած հյուրերին
21-03-2018 17:01:48 | Հայաստան | Մամլո հաղորդագրություն
4000 սմ երկարություն և 40 սմ լայնություն ունեցող աշխարհի ամենաերկար գաթան՝ պատրաստված ոչ ավանդական բաղադրատոմսով, այսօր մատուցվեց երևանցիներին և մայրաքաղաք այցելած հյուրերին:
Ռեկորդային երկարություն ունեցող գաթայի համտես-հյուրասիրությունը նախաձեռնել էր «Երեմյան Փրոջեքթս» ընկերությունը՝ նվիրված «Պանդոկ Երևանի» Տերյան մասնաճյուղի 4-ամյակին:
Ինչպես լրագրողների հետ զրույցում տեղեկացրեց «Երեմյան Փրոջեքթս»-ի շեֆ-հրուշակագործ Անահիտ Միքայելյանը, յուրահատուկ բաղադրատոմսով պատրաստված գաթան թխվել է 2 օրում՝ 3 հրուշակագործների մասնակցությամբ: Այն պատրաստելու համար պահանջվել է 55 կգ ալյուր, 20 կգ շաքարավազ, 75 կգ կարագ, 25 կգ նուշ, 300 ձու և 30 կգ հայկական չիր:
Կարևորելով ոչ մշակութային արժեքների պահպանումն ու տարածումը՝ «Երեմյան Փրոջեքթս»-ը հերթական նախաձեռնությամբ փորձեց երևանցիների և զբոսաշրջիկների համար ստեղծել յուրօրինակ միջոցառում՝ միաժամանակ ճանաչելի դարձնելով հայկական խոհանոցի ամենատարածված ու ծիսական աղանդերը՝ գաթան:
«Ազգային խոհանոցը ներկայացնելիս՝ մենք սովորաբար այն ներկայացնում ենք նորովի, և այս գաթան ևս բացառություն չէր: Ցանկացանք, որպեսզի մի քանի ժամ մայրաքաղաքն ուրախ տրամադրության մեջ լինի, նաև հետաքրքրացնենք երևանցիների և քաղաքի հյուրերի առօրյան»,- նշեց «Երեմյան Փրոջեքթս»-ի հասարակայնության հետ կապերի և մարքեթինգի բաժնի ղեկավար Անահիտ Գևորգյանը:
Վերջինիս խոսքերով՝ չնայած գաթան ռեկորդային երկարություն ունի, այդուհանդերձ, այն Գինեսի ռեկորդների գրքում գրանցելու մասին չեն մտածել:
Քաղաքապետ Տարոն Մարգարյանը պարգևատրել է ՀՀ դպրոցականների շախմատի 12-րդ օլիմպիադայի Երևան քաղաքի համայնքային փուլի հաղթողներին
21-03-2018 17:18:19 | Հայաստան | Մամլո հաղորդագրություն
Քաղաքապետարանի ճեմասրահում ամփոփվել են ՀՀ դպրոցականների շախմատի 12-րդ օլիմպիադայի Երևան քաղաքի համայնքային փուլի արդյունքերը: Հանդիսավոր արարողությանը ներկա են գտնվել Երևանի քաղաքապետ, Երևանի շախմատի ֆեդերացիայի նախագահ Տարոն Մարգարյանը, Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանը և ՀԲԸՄ Հայաստանի գործադիր տնօրեն Թալար Կազանջյանը:
Հարկ է նշել, որ ՀՀ դպրոցականների շախմատի 12-րդ օլիմպիադայի Երևանի համայնքային փուլին ընդհանուր առմամբ մասնակցել է 171 կրթական հաստատություն, որոնցից եզրափակիչ փուլին մասնակցելու իրավունք էին ստացել 10-ը դպրոցների թիմեր:
Մրցույթում առաջին հորիզոնականը զբաղեցրել է Երևանի «Ուսում» հանրակրթական դպրոցի թիմը, երկրորդ և երրորդ հորիզոնականները համապատասխանաբար զբաղեցրել են Երևանի Նիկոլ Աղբալյանի անվան համար 19 և Գագիկ Ստեփանյանի անվան համար 135 հիմնական դպրոցների թիմերը:
Հաղթող թիմերին մեդալներն ու հաղթական գավաթները հանձնել է անձամբ քաղաքապետ Տարոն Մարգարյանը:
Երևանյան փուլի եզրափակիչ երկօրյա մրցումներն, ի դեպ, ավանդույթի համաձայն այս տարի ևս անցկացվել են քաղաքապետարանի ճեմասրահում:
ՀԱՅԵՐԵՆ
Русский
English
Դաս. հայերեն
French
