Հովհաննես Բաբախանյանի «Պատգամը» մոնոներկայացմամբ կմեկնարկի «Արմմոնո» թատերական փառատոնը
28-04-2018 18:02:30 | Հայաստան | Մշակույթ
«Արմմոնո» մոնոներկայացումների միջազգային թատերական փառատոնն այս տարի կբացի դերասան, ՀՀ վաստակավոր արտիստ Հովհաննես Բաբախանյանի «Պատգամը» բեմադրությունը: Փառատոնը կմեկնարկի ապրիլի 28-ին Երևանի Հ. Թումանյանի անվան պետական տիկնիկային թատրոնում: Այս մասին ապրիլի 28-ին լրագրողների հետ հանդիպմանը խոսեցին կազմակերպիչներն ու մասնակիցները:
«Փառատոնն արդեն 16 տարեկան է: Այս տարի կցուցադրվի 22 մոնոներկայացում: Կմասնակցեն թատերարվեստի ներկայացուցիչներ աշխարհի տարբեր ծայրերից` Ռուսաստանից, ԱՄՆ-ից, Վրաստանից, Ուկրաինայից, Իսրայելից, Լեհաստանից, Իսպանիայից, Պորտուգալիայից»,-նշեց «Արմմոնո» փառատոնի տնօրեն Մարիաննա Մխիթարյանը:
Նրա խոսքով` փառատոնին ակտիվորեն հանդես են գալիս երիտասարդ ստեղծագործողներ: Նրանք ներկայացնում են գործեր տարբեր ժանրերում` մոնոդրամա, մոնոպար, մոնdoc և այլն:
Փառատոնի տնօրենը հույս հայտնեց, որ յուրաքանչյուր թատերասեր այս օրերին կգտնի այն ներկայացումը, որն իրեն ավելի հոգեհարազատ է:
16 տարի առաջ «Արմմոնո» փառատոնը մեկնարկել է Հովհաննես Բաբախանյանի «Կոնտրաբաս» ներկայացմամբ: Ինչպես արդեն նշեցինք, այս տարի այն կբացվի արտիստի «Պատգամը» բեմադրությամբ:
Նա ընդգծեց, որ այս «Արմմոնո»-ն նշանակալի իրադարձություն է, քանի որ այն փորձի փոխանակման հնարավորություն է տալիս, արվեստասերները ծանոթանում են թատերական նոր լուծումների, ճանաչում են նոր թատրոնը, դրա նոր տեսակը:
««Կոնտրաբաս»-ն իմ առաջ լայն հեռանկարներ բացեց: Ըստ իս`մոնոներկայացումը դերասանին իր ողջ գունապնակով հանդես գալու հնարավորություն է ընձեռում»,-ասաց նա:
Անդրադառնալով «Պատգամը»-ին` Բաբախանյանը նշեց, որ մարդը պետք է հասնի որոշակի տարիքի բեմից լուրջ թեմաների մասին խոսելու համար: «Հայոց ցեղասպանությունն այդպիսիններից է: Ես համարձակվեցի խոսել այդ ոճիրի մասին 50 տարեկանում: Կարծում եմ, որ այս տարիքում ավելի արդարացված է կանգնել բեմում և ասել մի բան, իրական արցունքներով, որոնք ոչ միայն քո կերպարինն են, այլև հենց քոնը»,-խոստովանեց դերասանը: Նա շեշտեց, որ ներկայացումը հայերեն է, սակայն այն չի ճանաչում տարիք և ազգություն, ընկալելի է բոլորի համար:
Դերասանուհի, «Պատգամը» ներկայացման բեմադրիչ Մարի Մսրյանն ասաց, որ ամեն հայի պարտքն է որևէ կերպ բարձրաձայնել Ցեղասպանության խնդիրը: «Կարծես թե շատ է ձգձգվում այն ընդունելու հարցը: Իբրև հայ, պետք է մեր հնարավորությունների սահմաններում դատապարտենք այդ չարիքը, որպեսզի այն չկրկնվի»,-ընդգծեց Մսրյանը:
Փառատոնի ընթացքում «Արմմոնո-Տրիումֆ» ծրագրի շրջանակում կցուցադրվեն 2016-2017 թվականներին հաջողություն ունեցած Նարինե Գրիգորյանի, Ելենա Դուդիչի և Նվարդ Դուդուկչյանի մոնոներկայացումները: «Արմմոնո-Դեբյուտ»-ում կցուցադրվեն առաջին անգամ քայլեր անող դերակատարների և բեմադրիչների աշխատանքներ: «Մեկ հեղինակի թատրոն» ծրագրում կցուցադրվեն դրամատուրգ Նինա Մազուրի «Համլետի երազները», «Էդիտ Պիաֆ» գործերը:
Առանցքային երկու նախագծերն են «Փարաջանով. Կյանքի տոն», «Անտիգոնեի սիրտը» մոնոներկայացումները:
Փառատոնին կանցկացվեն նաև վարպետության դասեր` նվիրված արդի մոնոթատրոնի զարգացման նոր ուղղություններին: «Գորիսը` 2018 թվականին ԱՊՀ մշակութային մայրաքաղաք» ծրագրի շրջանակում Գորիսում կցուցադրվի Նարինե Գրիգորյանի «Իմ ընտանիքը իմ ճամպրուկում է» ներկայացումը»:
Փառատոնն անցկացվում է ՀՀ մշակույթի նախարարության աջակցությամբ:
ՀԱՅԵՐԵՆ
Русский
English
Դաս. հայերեն
French
