Քաղաքացիները պետք է զինվեն համբերությամբ, որպեսզի ունքի տեղը աչքը չհանենք. Վարչապետը կոչ է անում դադարեցնել բողոքի ակցիաները ՏԵՍԱՆՅՈՒԹ
17-05-2018 14:15:29 | Հայաստան | Հասարակություն
Քաղաքացիները պետք է համբերությամբ զինվեն, որպեսզի ունքի տեղը աչքը չհանենք:
Նման կոչով իր ֆեյսբուքյան էջում ուղիղ միացամամբ քաղաքացիներին դիմեց ՀՀ վարչապետ Նիկոլ Փաշինյանը:
Ըստ նրա՝ ՀՀ ներկայիս կառավարությունն ունի ժողովրդի վստահությունը, հետևաբար քաղաքացիները քաղաքացիական անհնազանդության ակցիաներ իրականացնելու առիթ չունեն:
Վարչապետի խոսքերով՝ ՀՀ-ում կան բազմաթիվ խնդիրներ, որոնց լուծման համար կառավարությանը պետք է հնարավորություն տրվի դրանք դասակարգել ըստ առաջնահերթության:
««Իմ քայլը» նախաձեռնության ուղիղ նպատակը եղել է ՀՀ քաղաքացու հաղթանակը, և ուզում եմ արձանագրել, որ ՀՀ քաղաքացին հաղթել է՝ անձամբ որոշելով, թե ով պետք է լինի ՀՀ վարչապետը: Երբ մենք փակում էինք ճանապարհները, համոզված էինք, որ ՀՀ-ում չկա իշխանություն, որը պատրաստ է լսել քաղաքացիներին, ապրել նրանց հոգսերով և լուծել այդ խնդիրները, և հիմա, երբ հաստատված է մի իշխանություն, որը ժողովրդի մանդատն է ստացել, ապա ճիշտն ասած առանձնակի հասկանալի չէ, թե ում ենք մենք անհնազանդություն արտահայտում հիմա, երբ փակում ենք ճանապարհները»,- ընդգծեց Ն. Փաշինյանը՝ հորդորելով քաղաքացիներին իրենց խնդիրներն ու պահանջները ձևակերպել, առավելագույնը 3 հոգուց բաղկացած խմբեր կազմել և դիմել Տարածքային կառավարման և զարգացման նախարարություն: