Որ անձից էլ սկսեին կծիկի քանդումը, միևնույն է, մինչև առաջին դեմքեր գործընթացը գնալու է (ՏԵՍԱՆՅՈՒԹ)
23-06-2018 15:27:44 | Հայաստան | Հասարակություն
«Մինչև անգամ առաջին դեմքեր պետք է կիսեն այս պատասխանատվությունը»,- «Նոյյան Տապան»-ի թղթակցի հետ զրույցում նշեց Հելսինկյան ասոցիացիայի նախագահ, իրավապաշտպան Նինա Կարապետյանցը՝ անդրադառնալով Մանվել Գրիգորյանի գործին:
Ըստ նրա՝ Հայաստանում կան բազմաթիվ վերահսկողական մարմիններ, որոնցից ոչ մեկն իր գործառույթը չի կատարել, հակառակ դեպքում նման բացահայտումներ չէին լինի:
Ն. Կարապետյանցի համոզմամբ՝ որ անձից էլ սկսեին կծիկի քանդումը, միևնույն է, մինչև առաջին դեմքեր գործընթացը գնալու է:
«Թող հանկարծ որևէ մեկը հույս չունենա, որ աչք կփակեն: Անգամ, եթե նոր իշխանությունները ցանկություն չունենան, ապա կան կազմակերպություններ, որոնք զբաղվում են դրանով, և այդ կծիկը բացահայտվելու է»,- հավաստիացրեց իրավապաշտպանը:
Վերջինս, անդրադառնալով Մանվել Գրիգորյանի գործով անմեղության կանխավարկածի խախտմանը, փաստեց՝ եղել են նյութեր, որ խախտել են անմեղության կանխավարկածը:
Նրա խոսքերով՝ արձանագրված փաստը, անկախ նրանից, թե ով է արել, միանշանակ արդարացում չունի, բայց միաժամանակ պետք է զերծ մնալ գնահատականներից, մինչև վերջնական մեղքի արձանագրում չլինի: