ՀՀ-ն առաջին անգամ քաղաքակիրթ տեսքով ներկայացավ քաղաքակիրթ աշխարհին. Հայկ Սուքիասյան (ՏԵՍԱՆՅՈՒԹ)
13-07-2018 18:08:30 | Հայաստան | Հասարակություն
Հայաստանի Հանրապետությունը 1991 թվականից սկսած առաջին անգամ քաղաքակիրթ տեսքով ներկայացավ քաղաքակիրթ աշխարհին:
Այսպես բնութագրեց ՀՀ վարչապետ Նիկոլ Փաշինյանի եռօրյա պաշտոնական այցը Բրյուսել Քաղաքական գիտությունների թեկնածու, դոցենտ, ՀՀ ԳԱԱ փիլիսոփայության, սոցիոլոգիայի և իրավունքի ինստիտուտի գիտաշխատող Հայկ Սուքիասյանը:
Ըստ նրա՝ ակնհայտ էր Արևմուտքի ջերմ վերաբերմունքը ՀՀ ղեկավարի հանդեպ, որը դրսևորվեց գերտերությունների ներկայացուցիչների կողմից համաշխարհային պատմության մեջ ունիկալ հեղափոխականի հետ ծանոթանալու ձգտումներում:
«Այս ջերմ ընդունելությունը ՀՀ-ի համար հնարավորություն է տալիս դառնալ իրական միջնորդ մեր տարածքում Արևմուտքի և Ռուսաստանի միջև. Ինչքան էլ Ռուսաստանն այս պահին հոխորտա, որ իրենք դրա կարիքը չունեն, բայց ես վստահ եմ, որ Ռուսաստանի շրջափակումը և տնտեսական պատժամիջոցները դեռևս շուտ չեն վերացվելու, իսկ Ռուսաստանը տեխնոլոգիաների կարիք ունի տնտեսության մեջ ներդնելու, հետևապես Հայաստանը կդառնա այդ իրական միջնորդը, և մենք կարող ենք իրականացնել մեր պատմական քաղաքակրթական առաքելությունը, որը մեզ վրա դրել է Բրյուսովը»,- ընդգծեց Հ. Սուքիասյանը:
Վերջինիս խոսքերով՝ ՀՀ արտաքին քաղաքականության որակը փոխվել է, ինչը նշանակում է, որ Հայաստանը դառնում է քաղաքակիրթ, ինքնիշխան, արժանապատիվ պետություն:
Բանախոսը կարևորեց կոմպլեմենտար քաղաքականությունը՝ շեշետելով, որ ՆԱՏՕ-ի հետ հարաբերությունների պահպանումը բխում է Հայաստանի արտաքին քաղաքականության շահերից:
Անդրադառնալով Ադրբեջանում տեղի ունեցող վերջին իրադարձություններին՝ Հ. Սուքիասյանը նշեց, որ այնտեղ օբյեկտիվ գործընթաց է սկսվել, երբ թյուրքական տարրից ազատագրվում են բնիկ ժողովուրդները:
Նրա կարծիքով, դա հավանաբար նշանակում է, որ թյուրքական էթնոսը շատ է ագրեսիվացել, հետևաբար Հայաստանը պետք է անընդհատ բոլորին հիշեցնի, որ այս տարածաշրջանում՝ Ադրբեջանում և մի քիչ էլ Վրաստանում ձևավորվել են էթնոկրատական վարչակարգեր:
ՀԱՅԵՐԵՆ
Русский
English
Դաս. հայերեն
French
