Արցախի Հանրապետության պետական նախարար Գրիգորի Մարտիրոսյանը հուլիսի 13-ին ընդունել է ՀՀ աշխատանքի ու սոցիալական հարցերի նախարարի տեղակալ Սմբատ Սաիյանին և ՀՀ Սոցիալական ապահովության ծառայության պետ Արման Բոշյանին:

 

Ողջունելով հյուրերին՝ պետական նախարարը քննարկման գործնական հարցերից առանձնացրել է ՀՀ-ում սկսված կենսաթոշակային համակարգի արմատական բարեփոխումները՝ նշելով, որ դրանք պահանջված են նաև Արցախում: Այդ համատեքստում Գ. Մարտիրոսյանը իր գոհունակությունն է հայտնել օրեր առաջ ՀՀ աշխատանքի ու սոցիալական հարցերի նախարար Մանե Թանդիլյանի հետ Ստեփանակերտում կայացած հանդիպումից և ընդգծել, որ պայմանավորվել են սկզբունքային առումով ընդհանուր քաղաքականությունը իրականացնել փոխհամաձայնեցված եղանակով: «Գործող կենսաթոշակային համակարգը, որը կառուցվել է սերունդների համերաշխության սկզբունքի հիման վրա, լուրջ բարեփոխումների կարիք ունի: Համոզված եմ՝ ձեր այցը նոր թափ կհաղորդի գործընթացի կազմակերպմանը, և այդ ուղղությամբ մեր կողմից նախատեսվող քայլերը չեն ուշանա»,- ասել է Գ. Մարտիրոսյանը:

 

Շնորհակալություն հայտնելով ջերմ ընդունելության համար՝ ՀՀ աշխատանքի ու սոցիալական հարցերի նախարարի տեղակալ Ս. Սաիյանը նշել է, որ, ընդհանուր առմամբ արցախցի, իրենց գործընկերների հետ այդ ուղղությամբ նախանշված աշխատանք են իրականացնում: 

 

Թեմայի շուրջ ՀՀ Սոցիալական ապահովության ծառայության պետ Ա. Բոշյանը հավաստիացրել է, որ բացի մասնագիտական խորհրդատվական աշխատանքներից, իրենք պատրաստ են գործնական հարցերում ևս շոշափելի աջակցություն ցուցաբերել:

 

Հանդիպման ընթացքում զրուցակիցները մտքեր են փոխանակել նաև իրականացվող բարեփոխումների շրջանակում հաշմանդամության կարգի հստակեցմանը, կենսաթոշակների բարձրացմանը և եկամտահարկի վերանայմանը վերաբերող հարցերի շուրջ: 

 

Հանդիպմանը մասնակցել է ԱՀ աշխատանքի և սոցիալական հարցերի նախարար Սամվել Ավանեսյանը:

 

Նոյյան տապան  -   Մամլո հաղորդագրություն