Ընտրվելու դեպքում Կոռնիձորի Արոն պարտավորվում է ԵԿՄ-ն մաքրել այն բարոյազրկողներից (ՏԵՍԱՆՅՈՒԹ)
17-07-2018 16:59:34 | Հայաստան | Հասարակություն
Երկրապահ կամավորականների միության (ԵԿՄ) անդամ տեսնում եմ միայն և միայն պատերազմ անցած հրամատարի, ով գոնե մի քանի անգամ հայտնվել է շրջափակման մեջ, ճեղքել այն, ունեցել է հաղթանակներ և պարտություններ:
Այս մասին հուլիսի 17-ին լրագրողների հետ հանդիպման ժամանակ հայտարարեց ԵԿՄ հիմնադիր նախագահ, «Կոռնիձոր» ջոկատի հրամանատար Արա Խուդավերդյանը (Կոռնիձորի Արո), ում թեկնածությունը ԵԿՄ նախագահի պաշտոնում առաջադրել են ԵԿՄ-ից զատված ազատամարտիկների 18 ՀԿ-ներ:
Ըստ նրա՝ ԵԿՄ վարչաությունն այսօր հանդիսանում է Հանրապետական կուսակցության կուռ հավաքատեղի, որը միշտ եղել է ՀՀԿ-ի կեղծարարը և կեղտոտ հանձնարարականներ կատարողը:
«Տղանե՛ր, ժամանակն է, ուշքի եկեք և մեղքերի թողություն խնդրեք»,- դիմեց ԵԿՄ վարչության անդամներին Ա. Խուդավերդյանը՝ հավելելով, որ ընտրվելու դեպքում պարտավորվում է մաքրել ԵԿՄ-ն այն բարոյազրկողներից:
Լրագրողի այն հարցին, թե ինչպես է վերաբերում ԵԿՄ նախագահի պաշտոնում Արամ Սարգսյանի թեկնածությանը՝ բանախոսն ընդգծեց, որ դեմ է և չի ընդունում, երբ ուժային կառույցի ղեկավար է ընտրվում որևէ կուսակցության ղեկավարը:
Նրա խոսքերով՝ ԵԿՄ-ի համբավը պետք է վերականգնեն թշնամու, փողի և պաշտոնի առջև չծնկած տղաները:
Իր պաշտոնավարման դեպքում Ա. Խուդավերդյանը խոստանում է ստեղծել հրամանատարական խորհուրդ, որը լինելու է սոցիալապես անապահով և ֆինանսական աջակցության կարիք ունեցող ազատամարտիկների խնդիրների լուծման անմիջական պատասխանատուն:
«Հարցը բարձրացվելու է պետական մակարդակով, եթե խնդիր կա օրենք փոխելու, մտնելու ենք Ազգային ժողով և հասնելու ենք նրան, որ ազատամարտիկի կենցաղը փոքվի, որ ազատամարտիկն իրեն չզգա նվաստ»,- շեշտեց Ա. Խուդավերդյանը՝ վստահեցնելով, որ իրենք գումարները չեն գրպանելու և արջերին չեն կերակրի զինվորի բաժնով:
ՀԱՅԵՐԵՆ
Русский
English
Դաս. հայերեն
French
