Նիկոլ Փաշինյանը պետք է զգուշորեն արտահայտվի նման հարցերի շուրջ. ռուս քաղաքագետը՝ Փանիկի դեպքերի շուրջ վարչապետի արձագանքի մասին․Tert.am
19-07-2018 18:58:20 | Հայաստան | Ի՞նչ է գրում մամուլը
Tert.am Հայաստանի վարչապետը պետք է զգուշորեն արտահայտվի Հայաստանում հակառուսական տրամադրություններ բորբոքող իրադարձությունների վերաբերյալ: Այս մասին Tert.am-ի հետ զրույցում ասաց Մերձավոր Արևելքի և Կովկասի երկրների հարցերով ռուսաստանցի փորձագետ Ստանիսլավ Տարասովը՝ խոսելով 102-րդ ռուսական ռազմաբազայի զինծառայողների կողմից Փանիկ գյուղում անցկացրած զորավարժությունների վերաբերյալ վարչապետ Նիկոլ Փաշինյանի արձագանքի մասին, որ սա սադրանք է՝ ընդդեմ հայ-ռուսական բարեկամական հարաբերությունների և սադրանք՝ ընդդեմ Հայաստանի ինքնիշխանության:
Ստանիսլավ Տարասովն ասաց, որ տեղի ունեցածը ցավալի է, բայց որպես կանոն՝ Հայաստանի իշխանությունները ռուսական 102-րդ ռազմաբազայի նման գործողությունների մասին տեղեկացված են լինում:
«Պետք է պարզել, թե ինչու է դա տեղի ունեցել, որպեսզի պարզվի, թե ով է մեղավոր, ով մեղավոր չէ: Ես իհարկե չեմ կասկածում ո՛չ Հայաստանի իշխանությունների, ո՛չ էլ ռազմաբազայի պաշտոնական ներկայացուցիչների բացատրություններին, բայց ուսումնասիրություն ամեն դեպքում պետք է տանել»,- ասաց քաղաքագետը:
Նա նշեց, որ իր համար մտահոգիչ է, որ հայ-ռուսական հարաբերություններում որոշ մարդիկ արհեստականորեն սեպեր են խրում:
«Ուզեք թե չուզեք, ռուսական ռազմաբազայի առկայությունը Հայաստանում երաշխավորում է ՀՀ անվտանգությունը, և ես ուզում եմ հարց ուղել այն հայերին, ովքեր դեմ են արտահայտվում Հայաստանում ռուսական ներկայացվածությանը՝ դուք ո՞ւմ եք սպասում` թուրքերի՞ն, թե ադրբեջանցիներին, թե՞ մտածում եք, որ ԱՄՆ-ն է գալու ու ներկայացվածություն ապահովի: Ենթադրենք, ռուսները գնացին, հետո, ի՞նչ է լինելու, պատկերացնո՞ւմ են նրանք»,- նշեց Ս. Տարասովը:
Քաղաքագետի խոսքով` որոշ ուժեր բորբոքում են հակառուսական տրամադրություններ և Նիկոլ Փաշինյանը պետք է զգուշորեն արտահայտվի նման հարցերի շուրջ, ընտրի ձևակերպումները: «Ասել, որ սադրանք է… Նա հնարավորություն ունի ռուսական բարձր իշխանությունների հետ պարզել իրավիճակը նման հայտարարություններից առաջ, պարզաբանումներ ստանալ, հետո որակել դա սադրանք: Սա անհասկանալի հայտարարություն է»,- շեշտեց նա:
Տարասովը նշեց, որ պաշտոնական Մոսկվան կարձագանքի ռազմավարական դաշնակից, ՀԱՊԿ անդամ Հայաստանի նման հայտարարություններին: «Ռուսները հենց այնպես չեն հայտնվել Գյումրիում: Ռազմաբազան տեղակայվել է համաձայնությամբ: Բոլորին հասկանալի է, որ զորավարժություններ անցկացվում են, դա նորմալ է, ես չեմ կարող չհավատալ Հայաստանի, 102-րդ բազայի ներկայացուցիչներին, դրա համար նորից եմ կրկնում, սա պետք է լրացուցիչ ուսումնասիրվի»,- հավելեց Ստանիսլավ Տարասովը:
ՀԱՅԵՐԵՆ
Русский
English
Դաս. հայերեն
French
