Չենք ունենալու այնպիսի քրեական գործ, որը քաղաքական որոշմամբ կկանգնեցվի. Նիկոլ Փաշինյան (ՏԵՍԱՆՅՈՒԹ)
20-07-2018 18:13:53 | Հայաստան | Հասարակություն
«Չենք ունենալու այնպիսի քրեական գործ, որը քաղաքական որոշմամբ կկանգնեցվի»,- այսօր լրագրողների հետ հանդիպման ժամանակ ընդգծեց վարչապետ Նիկոլ Փաշինյանը՝ հավելելով. «Չենք ունենալու նաև այնպիսի քրեական գործ, որը վարող քննիչի դերում կհայտնվի ՀՀ վարչապետը»:
Ըստ Ն. Փաշինյանի՝ Հայաստանում բոլոր քննչական և իրավապահ մարմինները գիտեն ու համոզվել են, որ որևէ գործի քննության համար չկա որևէ սահմանափակում:
Անդրադառնալով կառավարության վարած կադրային քաղաքականությանը՝ վարչապետը նկատեց, որ նշանակված նոր հին կադրերը գտնվում են ադապտացման փուլում:
Նրա խոսքերով՝ այսօր կառավարությունում աշխատում են նոր և հին կադրեր, և մարդիկ, ովքեր այժմ փոխել են իրենց գործելաոճը:
«Այն, ինչ տեղի է ունեցել ՀՀ-ում, շարքային փոփոխություններ չեն, այլ ազգային ամբիցիաների փոփոխություններ են, ընդ որում դա չի կանխատեսվել շատերի կողմից։ Մենք հասնելու ենք կադրային հեղափոխության էջին, սակայն գերանդին չենք վերցնելու ու սկսենք հնձել բոլորին»,- շեշտեց Ն. Փաշինյանը՝ չբացառելով, որ կարող են սխալվել, սակայն կաշկանդված չեն իրենց սխալն ուղղելու ճանապարհին: