ՀՅԴ-ն դեմ է այս ձևով պետության դերի ամրագրմանը, և երկիրն այս վիճակից հանելու իր «դեղատոմսն» է առաջարկում (տեսանյութ)
13-08-2018 22:55:31 | Հայաստան | Քննարկում
ՀՅԴ-ն հարկային ոլորտում առաջարկում է կիրառել այնպիսի քաղաքականություն, որպեսզի հարուստներն ավելի բարձր տոկոսով հարկ վճարեն, քան պակաս եկամուտներ ստացողները:
Ի թիվս այլ առաջարկների, Դաշնակցությունն առաջարկում է նաև իրենց գերիշխող դիրքը չարաշահողների նկատմամբ նախատեսված տուգանքների չափը բարձրացնել, ընդ որում, այն չափով, որ փոխի նրանց վարքագիծը, որպեսզի գերիշխող դիրքը չարաշահողն արդեն մտածի` չարաշահի՞ այդ դիրքը, թե ոչ:
Այսօր «Նոյյան Տապան» լրատվական կենտրոնի ուղիղ եթերում հեռարձակվող «Քննարկում» հաղորդաշարի ընթացքում այս մասին ասաց և Դաշնակցության այլ առաջարկները ներկայացրեց ՀՅԴ Բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանը։
«Պետությունը պետք է այնպիսի արդար բաշխման սխեմաներ ներմուծի, որ բարիքներից ավելի շատ ստացողները հարաբերականորեն ավելի մեծ պատասխանատվություն ունենան հանրության առաջ և սոցիալական խնդիրները լուծելու առաջ, այլ կերպ ասած, այստեղ պետք է հանգենք եկամտահարկի պրոգրեսիվ հարկման ներդրմանը,- ասաց Թադևոս Ավետիսյանը։ Մենք կարծում ենք, որ ցածր եկամուտ ունեցողները, այսինքն` նվազագույն շեմից ներքև եկամուտները պետք է ավելի արագ աճեն: Այսինքն` նրանց վրա ավելի քիչ հարկային բեռ պետք է լինի, իսկ գնալով, ինչքան բարձրանում են եկամուտները, այնքան հարկային բեռը պետք է ավելանա: Միանշանակ է, որ մենք նաև անդրադառնում ենք նաև նրան, որ, այո, պետք է պետական հսկողության և վերահսկողության արդյունավետությունը բարձրացվի»:
Ըստ Թ. Ավետիսյանի, դա հատկապես անհրաժեշտ է, որովհետև միանշանակ է, որ ստվերային մեծ տնտեսության պարագայում, երբ որ շուկան էլ փոքր է, փոքր շուկայում մրցակցությունը սկսում է տուժել, առավել ևս, որ փոքր շուկան հակված է, որ ազատ մրցակցությունը սկսի խաթարվել, որովհետև խաղացողները քիչ են, հնարավոր են պայմանավորվածություններ և այլն:
Ինչպես նշեց ՀՅԴ Բյուրոյի տնտեսական հետազոտությունների գրասենյակի ծրագրերի համակարգողը, փոքր շուկա ունեցող մեզ նման երկրում, որտեղ նաև սոցիալական խնդիրներ կան, եթե ստվերն էլ մեծ է լինում, այսինքն` սահմանած խաղի կանոններն էլ չեն պաշտպանվում, արդար մրցակցությունն այլևս գնալով ետ է գնում և, բնականար, նաև արդար մրցակցության ցանկացած շեղում ու ձախողում իսկապես հանգեցնելու է մենաշնորհների կամ գերիշխող դիրքի չարաշահման, հանգեցնելու է նաև սոցիալական խնդիրների խորացման, եկամուտների բևեռացման և այլն: «Քննարկում» հաղորդաշարի հյուրի հավաստմամբ, իրենք անդրադարձել են, բնականաբար, և՛ արդար մրցակցության խնդիրներին, և՛ բնական մենաշնորհների կարգավորմանը:
«Այստեղ,- շարունակեց Թադևոս Ավետիսյանը,- մի շատ կարևոր մոտեցում ենք առաջ քաշել, որը նախկինում էլ կար, և մեզ քիչ չեն քննադատել նաև այս մոտեցման համար: Մենք կարծում ենք, որ բնական մենաշնորհները պետք է ոչ միայն ենթարկվեն անուղղակի պետական կարգավորման, այսինքն` պետությունն այստեղ որոշակիորեն գնային քաղաքականությունը կարգավորի, այլև պետական մասնակցության: Պետությունը պետք է այստեղ փայատեր լինի` այն էլ ձայնի իրավունքով, վերահսկիչ փաթեթն իրենը պետք է լինի` որոշումներ կայացնելու: Բնական մենաշնորհները, կարծում եմ, հայտնի են բոլորիս, դրանք են թե՛ էներգետիկայի ոլորտը, թե՛ ջուրը, գազը և այլն: Այսինքն` բնական մենաշնորհներն ունեն և՛ անվտանգության բաղադրիչ, և՛ սոցիալական մեծ բաղադրիչ (գաղտնիք չէ, որ մենք մեր ստեղծած եկամտի մեծ մասը ծախսում ենք այդ ոլորտներում և` կայուն), և՛ տնտեսական զարգացման մեծ բաղադրիչ, որովհետև իրենք ենթակառուցվածք են, և ցանկացած բիզնես եթե ուզում եք սկսել, պետք է հաշվի նստեք այդ ենթակառուցվածքների էֆեկտիվության հետ: Եվ այստեղ, այո, պետությունը պետք է ունենա մասնակցություն, և սա մեր առաջ քաշած մոտեցումներից է»:
Հիշյալ գրասենյակի ծրագրերի համակարգողի հավաստմամբ, շուկայում արդար մրցակցություն ապահովելու համար, պետությունն, առաջին հերթին, պետք է ունենա այնպիսի ինստիտուտ` իր գործիքակազմով, որը կկարողանա գերիշխող դիրքի չարաշահման դեպքում կիրառել համարժեք միջոցներ: Մինչդեռ, այսօր գերիշխող դիրքի չարաշահման դեպքում կիրառվող տուգանքներն ընդհանրապես համարժեք չեն գերիշխող դիրքի չարաշահման տված վնասներին, այդ տուգանքները որևէ ձևով չեն ազդում իրենց գերիշխող դիրքը չարաշահողների վարքագծի վրա, հետևաբար ՀՅԴ-ն այն համոզմանն է, որ այդ տուգանքների չափը պետք է բարձրացվի, ընդ որում, այն չափով, որ փոխի նրանց վարքագիծը, որպեսզի գերիշխող դիրքը չարաշահողն արդեն մտածի` չարաշահի՞ այդ դիրքը, թե ոչ:
«Երկրորդը,- շարունակեց Թադևոս Ավետիսյանը,- մենք ասում ենք, որ նրանց ինստիտուցիոնալ կարողությունը` պետական այդ մարմնի, որն այսօր կա և այս կամ այն չափով գերիշխող դիրքի չարաշահման դեմ պայքար է տանում, էապես պետք է հզորացնել»:
Անդրադառնալով պարտադիր կուտակային համակարգին, «Քննարկում» հաղորդաշարի հյուրն ասաց.
«Մենք, երբ որ կոալիցիոն կառավարության կազմում էինք նախկինում, և դրանից հետո Դաշնակցությունը միշտ դեմ է եղել պարտադիր կուտակային համակարգին, անկախ նրանից` կառավարության կազմում է, թե ոչ:- Մենք բազմաթիվ անգամներ, և վերջինն ընդամենը մեկ ամիս առաջ նորից հանդես եկանք այդ համակարգին դեմ հստակ փաստարկներով, վերլուծականով, և առիթ ունեցանք ներկայացնել այդ մոտեցումները»:
Օգոստոսի 13-ին Երևանի ժամանակով ժամը 10:00-ից 11։00-ը հաղորդմանը կարելի էր հետևել առցանց՝ «Նոյյան Տապան»-ի www.nt.am կայքով, «Նոյյան Տապան» հեռուստաընկերության Youtube-յան ալիքով, «Նոյյան Տապան» ֆեյսբուքյան էջում և «Noyan Tapan» ֆեյսբուքյան խմբում։
Հաղորդման ուղիղ հեռարձակման ընթացքում կարելի է զանգահարել եւ հարցեր ուղղել բանախոսներին ամերիկյան 818 967 53 21 եւ հայաստանյան +374 60 35 11 31 հեռ/համարներով, Wiber, WhatsApp +374 55 50 90 75 համարով:
«Նոյյան Տապան»-ին աջակցել ցանկացողները կարող են մուտք գործել համապատասխան բաժինը հետեւյալ հղումներով
Սիրելի հայրենակիցներ, մենք շատ ուրախ ենք տեսնել ձեր գրառումները եւ քննարկումները, սակայն հայհոյանքները ջնջվելու են, իսկ գռեհիկ գրառումների հեղինակները արգելափակվելուեն։
ՀԱՅԵՐԵՆ
Русский
English
Դաս. հայերեն
French
