«Օրենքները հարմարեցվել են հենց փոշիացման և թալանի գործողություններն ազատ կատարելուն». Հրայր Մելքոնյան (տեսանյութ)
16-08-2018 19:59:17 | Հայաստան | Քննարկում
Հայաստանի տնտեսական կարողությունների, ներառյալ նաև հանքերի թալանի պատճառը ոչ միայն համապատասխան պետական պաշտոնյաների անփորձությունը, մասնագետ չլինելը, կոռումպացվածությունը, այլև մեր վատ օրենքներն են եղել: «Տանիք» ՀԿ-ի նախագահ Հրայր Մելքոնյանն այս տեսակետի հետ այնքան էլ համաձայն չլինելով, փաստում է, որ այդ մարդիկ օրենքները պատրաստել և հարմարեցրել են իրենց:
«Օրենքները հարմարեցվել են հենց փոշիացման և թալանի գործողություններն ազատ կատարելուն,- այսօր «Նոյյան Տապան» լրատվական կենտրոնի ուղիղ եթերում հեռարձակվող «Քննարկում» հաղորդաշարի ընթացքում ասաց Հրայր Մելքոնյանը:- Իննսունականներին, երբ Հայաստանն անկախացավ, այդ ժամանակ ընդունվեց Հայաստանի Անկախության հռչակագիրը: Հայաստանի Անկախության հռչակագրում սահմանվեց, թե որն է ազգային հարստությունը և ում է պատկանում ազգային հարստությունը: Ազգային հարստության էլեմենտներն էին հողը, ջուրը, օդային տարածությունը, ընդերքը, և հռչակագրի 7-րդ կետում հստակ գրված էր, որ դա պատկանում է Հայաստանի ժողովրդին: Իհարկե, այդ ժամանակ էլ, մինչև Սահմանադրության փոփոխությունը, լինում էին որոշակի բացասական երևույթներ, լինում էին շեղումներ, բայց 2015 թվականի Սահմանադրության մեջ կատարվեց փոփոխություն»:
Թեև Սահմանադրության նախաբանում նշված է` հիմք ընդունելով Հայաստանի Հանրապետության Անկախության հռչակագիրը, բայց, ինչպես «Քննարկում» հաղորդաշարի հյուրը նշեց, Սահմանադրության մեջ մտցվել է 10-րդ հոդվածի 2-րդ կետ, որտեղ գրված է, որ ջրային ռեսուրսները, ընդերքը պետության բացառիկ սեփականությունն են, այսինքն` փոխվեց հռչակված սեփականատերը:
«Ճիշտ է, հիմնավորում էին, որ պետությունն էլ է ժողովրդինը, դրա համար կառավարման առումով այսպես գրելը ճիշտ է, բայց ասեմ, նախ, այդ կետը թաքուն մտցվեց, որովհետև քննարկումների ժամսնակ այդ կետը չի եղել, միայն քվեարկության ժամանակ է այդ կետն ի հայտ եկել, և, բացի դրանից, չմոռանանք, որ այդ Սահմանադրությունը, ըստ էության, մեր ժողովուրդը չի էլ ընդունել»,- ասաց Հրայր Մելքոնյանը:
«Տանիք» ՀԿ-ի նախագահի կարծիքով, առաջին քայլը պետք է լինի հենց Սահմանադրության այդ կետի վերացումը, այսինքն` Հայաստանի Հանրապետության ազգային հարստությունը պետք է պատկանի Հայաստանի Հանրապետության ժողովրդին այնպես, ինչպես գրված է հռչակագրում: «Քննարկում» հաղորդաշարի հյուրը նշեց նաև, որ ՀՀ Սահմանադրության նախաբանի, որը հղում է կատարում, որպես հիմք վկայակոչում է ՀՀ Անկախության հռչակագիրը, և Սահմանադրության 10-րդ հոդվածի 2-րդ կետի միջև առկա է հակասություն: Իսկ ի՞նչ է նշանակում, որ հողը, ջուրը, օդային տարածությունը, ընդերքը պատկանում են ժողովրդին:
«Կուզենայի խոսել բնական իրավունքի մասին,- շարունակելով իր խոսքը, ասաց Հրայր Մելքոնյանը:- Մարդը ծնվում է, նա շնչում է, ջուր է խմում, օգտվում է նաև իր հողից, բնության տվածից, և առանց դրա, մարդը չի կարող ապրել: Այսինքն` այդ ջուրը պատկանում է այդ մարդուն իր չափով և այդ մարդուց անօտարելի է, ընդերքը պատկանում է այդ մարդուն և իրենից անօտարելի է, այսինքն` եթե դա չլինի, այդ մարդը չի կարողանա ապրել: Այսինքն` կան ռեսուրսներ, որոնք մարդուն անհրաժեշտ են, որոնք պետք է պատկանան մարդուն, և հենց բնական իրավունքով պետք է պատկանան այդ մարդուն: Ոչ միայն այդ մարդուն պետք է պատկանան, նաև եկող սերնդին պետք է պատկանան, այսինքն` եթե այսօր ջուրն օգտագործվում է վայրի ձևով, և Արարատյան ավազանն իջնում է, ապա եկող սերունդներին ի՞նչ է հասնելու…»:
Երևանի ժամանակով ժամը 10:00-ից 11։00-ը հաղորդմանը կարելի էր հետևել ԱՄՆ հայկական AABC հեռուստաընկերությամբ, ինչպես նաև առցանց՝ «Նոյյան Տապան»-ի www.nt.am կայքով, «Նոյյան Տապան» հեռուստաընկերության Youtube-յան ալիքով, «Նոյյան Տապան»-ի ֆեյսբուքյան էջում և «Noyan Tapan» ֆեյսբուքյան խմբում։
Հաղորդման ուղիղ հեռարձակման ընթացքում կարելի է զանգահարել եւ հարցեր ուղղել բանախոսներին ամերիկյան 818 967 53 21 եւ հայաստանյան +374 60 35 11 31 հեռ/համարներով, Wiber, WhatsApp +374 55 50 90 75 համարով:
«Նոյյան Տապան»-ին աջակցել ցանկացողները կարող են մուտք գործել համապատասխան բաժինը հետեւյալ հղումներով
Սիրելի հայրենակիցներ, մենք շատ ուրախ ենք տեսնել ձեր գրառումները եւ քննարկումները, սակայն հայհոյանքները ջնջվելու են, իսկ գռեհիկ գրառումների հեղինակները արգելափակվելուեն։