Սահմանին լարվածություն ստեղծելով՝ Ադրբեջանը ստուգում է Մոսկվայի և ՀԱՊԿ-ի արձագանքը (ՏԵՍԱՆՅՈՒԹԵՐ)
17-09-2018 16:44:10 | Հայաստան | Քաղաքական
Զորավարժությունների այս սցենարով Ադրբեջանի ռազմաքաղաքական ղեկավարությունը մեսիջ է ուղարկում հայ ժողովրդին, որ ոչնչացնելու է Արցախում տեղակայված բոլոր ռազմական օբյեկտները:
Այս մասին սեպտեմբերի 17-ին լրագրողների հետ հանդիպման ժամանակ նշեց ադրբեջանագետ Աշոտ Մովսիսյանը՝ անդրադառնալով այսօր Ադրբեջանում մեկնարկած լայնածավալ զորավարժություններին:
Ըստ նրա՝ հակառակորդ երկրում մեկնարկած զորավարժությունները չպետք է կապել Հայաստանում օրերս ավարտված Շանթ-2018 զորավարժությունների հետ, քանի որ այդ երկրում ամեն տարի սեպտեմբեր-հոկտեմբեր ամսիներին տեղի են ունենում նման զորավարժություններ:
Ադրբեջանագետի խոսքերով՝ նախորդ տարիներին և այս տարի անցկացվող զորավարժությունների միակ տարբերությունն այն է, որ առաջին անգամ Ադրբեջանը բացահայտել է լայնամասշտապ զորավարժությունների սցենարը:
«Ուզում եմ շեշտել, որ այդ զորավարժությունները նախապես պլանավորված են եղել, տրամաբանությունն է այսդպես հուշում, որովհետև նման լայնածավալ զորավարժություններին պետք է նախապատրաստվել մի քանի ամիս առաջ»,- նշեց Ա. Մովսիսյանը:
Վերջինս անդրադառնալով սահմանային լարվածությանը՝ նկատեց, որ այն պայմանավորված է վերջին աշխարահաքաղաքական զարգացումներով, մասնավորապես, Հայաստան-ՀԱՊԿ, Հայաստան-Ռուսաստան հարաբերություններով և դրանցում առկա որոշակի խնդիրներով:
«Ադրբեջանն օգտվելով այս ամենից, փորձում է իր հարաբերությունները խորացնել Ռուսաստանի հետ և դա անել ի հաշիվ հայ-ռուսական հարաբերությունների»,- ընդգծեց բանախոսը՝ հավելելով, որ սահմանին լարվածություն ստեղծելով՝ Ադրբեջանը նաև ստուգում է Մոսկվայի և ՀԱՊԿ-ի արձագանքը: