Մենք որևէ առնչություն չունենք ԱԱԾ տնօրենի խոսակցության գաղտնալսման հետ. Հայկ Նահապետյան (տեսանյութ)
22-09-2018 20:16:20 | Հայաստան | Քննարկում
ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսային խոսակցության հայտնի գաղտնալսման ու ձայնագրության առիթով ՀՀ քննչական կոմիտեի հատկապես կարևոր գործերի քննության գլխավոր վարչության և ոստիկանության կազմակերպված հանցավորության դեմ պայքարի գլխավոր վարչության աշխատակիցները սեպտեմբերի 17-ին խուզարկություն են կատարել «Քրիստոնեական արժեհամակարգի և ավանդական ընտանիքի պաշտպանության» նախաձեռնության գրասենյակում, ինչպես նաև նախաձեռնության անդամներից Հայկ Այվազյանի գրանցման հասցեում, առգրավել համակարգիչներ, հիշողության կրիչներ, անձնական բջջային հեռախոսներ:
Նախ համառոտ այն մասին, թե ինչով է զբաղվում հիշյալ նախաձեռնությունն ընդհանրապես: Ինչպես «Նոյյան Տապան» լրատվական կենտրոնի ուղիղ եթերում հեռարձակվող «Քննարկում» հաղորդաշարի ընթացքում տեղեկացրեց «Քրիստոնեական արժեհամակարգի և ավանդական ընտանիքի պաշտպանության» նախաձեռնության անդամ Հայկ Նահապետյանը, իրենք հասարակական ոլորտում ակտիվ գործունեություն սկսել են 2013 թ.-ից, բավական արդյունավետ աշխատանքի շնորհիվ հասել նրան, որ գենդերային հայտնի օրենքի կիրարկման համար ենթաօրենսդրական իրավական ակտեր չընդունվեն, նշված օրենքը գործնականում չկիրարկվի:
Դրանից հետո նախաձեռնության հիմնական գործունեությունն ուղղված է եղել Հայաստանում միասեռականության քարոզչության դեմ: Բացի այդ, նախաձեռնությունը զբաղվել է մեր երկրում այլասերվածների իրավունքների պաշտպանությամբ հանդես եկող կազմակերպությունների գործունեությունը բացահայտելով, վերջին շրջանում բավական ակտիվ է եղել Վեհափառ Հայրապետի և Մայր Աթոռ Սուրբ Էջմիածնի դեմ ծավալվող գործունեությունը բացահայտելու և չեզոքացնելու գործում, քարոզչական դաշտում պաշտպանել ու սատարել կաթողիկոսին և եկեղեցուն:
«Մեր գործունեությունը, փաստորեն, այս պահի դրությամբ ամբողջովին կազմալուծվել է, տարել են տեխնիկան, բացարձակապես, մեծ հաշվով, ոչինչ չենք կարող անել, նույնիսկ 2 օր հեռախոս չունեինք, մինչև գնեցինք, սովորական հեռախոսներն են անգամ տարել»,- ասաց Հայկ Նահապետյանը:
Վերջինիս հավաստմամբ, Հայաստանին տրված գենդերային և այլ օրենքների ընդունման նախաձեռնողականությունը Հայաստանից չի գալիս, այդ նախաձեռնողականությունը հիմնականում Եվրամիությունից է: Ի նպաստ այլասերվածության տարածման, օրինականացման և այլ օրենքների նախագծերի դեմ, ինչպես նաև ընդունված օրենքների փոփոխության, չկիրարկման համար պայքարել են 2013 թվականից, այսինքն` դեռ նախորդ իշխանության շրջանից: Ինչ-որ բաներ հաջողել են, հասել են նրան, որ օրենքների նախագծերից մի շարք վտանգավոր դրույթներ հանվեն:
Այլասերվածության, պղծությունների, դրանց քարոզչության դեմ «Քրիստոնեական արժեհամակարգի և ավանդական ընտանիքի պաշտպանության» նախաձեռնության հասարակական գործունեությունը, չնայած վերջինիս ունեցած փոքր միջոցներին, բավականին դրական է գնահատվում ժողովրդի մեջ, քանի որ այլասերվածության, պղծությունների, նրանց քարոզչության վերաբերյալ մարդկանց ընկալումները միանշանակ նույնական են:
Այդ կապակցությամբ Հայկ Նահապետյանը վկայակոչեց մասնագիտական մի լուրջ հաստատության` ԱՄՆ-ի «Պյու» կենտրոնի կատարած հարցման արդյունքները (կենտրոնն իր հետազոտությունների արդյունքները, առաջին հերթին, դնում է փորձագիտական շրջանակների սեղանին, հետո նաև բարձրաստիճան պաշտոնատար անձանց), որոնց համաձայն, Հայաստանի Հանրապետության բնակչության 98 տոկոսը դեմ է միասեռականության և այլասերվածության մյուս դրսևորումների և՛ տարածմանը, և՛ օրինականացմանը:
«Հետևաբար ելնելով այդ իրողությունից, նրանք, ովքեր այսօր այս կամ այն ձևով փորձ են անում խոչընդոտել մեզ, ուղղակիորեն մեզ խոչընդոտելով, բնականաբար, դժգոհություն են առաջ բերում մեր բոլոր համախոհների և ժողովրդի մոտ, և սլաքը դժգոհության, բնականաբար, դյուրին կերպով կարող է ուղղորդվել նաև Հայաստանի այսօրվա իշխանություններին»,- ասաց «Քննարկում» հաղորդաշարի հյուրը:
Հիշյալ նախաձեռնության անդամը հիմարությունների դաշտից համարեց խուզարկության վերաբերյալ դատարանի որոշման մեջ նշվածը` այն, որ ինքը և Հայկ Այվազյանը հավանական ձայնագրողներն են: Ըստ նրա, օպերատիվ տվյալների հետ աշխատողները պետք է մի փոքր ծանրութեթև անեին, թե ինչ են անում:
Երևանի ժամանակով ժամը 10:00-ից 11։00-ը հաղորդմանը կարելի էր հետևել ԱՄՆ հայկական AABC հեռուստաընկերության ուղիղ եթերում, ինչպես նաև առցանց՝ «Նոյյան Տապան»-ի www.nt.am կայքով, «Նոյյան Տապան» հեռուստաընկերության Youtube-յան ալիքով, «Նոյյան Տապան» ֆեյսբուքյան էջում և «Noyan Tapan» ֆեյսբուքյան խմբում։
Ուղիղ եթերից հետո բանախոսին ուղղված հարցերն ու մեկնաբանությունները կարելի է թողնել՝ զանգհարելով ամերիկյան 818 9675321 և հայաստանյան 060 351131 հեռախոսահամարներով։ Ձեր խոսքի ձայնագրությունները հետագայում կօգտագործվեն «Հետադարձ կապ» հաղորդաշարում։
Մանրամասները՝ տեսանյութում:
Արթուր Հովհաննիսյան
Հաղորդումները ուղիղ հեռարձակմամբ կարելի է դիտել Նոյյան Տապան Ալիքով, որը հեռարձակվում է հետևյալ մալուխային ցանցերով․
Հաղորդման ուղիղ հեռարձակման ընթացքում կարելի է զանգահարել եւ հարցեր ուղղել բանախոսներին ամերիկյան 818 967 53 21 եւ հայաստանյան +374 60 35 11 31 հեռ/համարներով, Wiber, WhatsApp +374 55 50 90 75 համարով:
«Նոյյան Տապան»-ին աջակցել ցանկացողները կարող են մուտք գործել համապատասխան բաժինը հետեւյալ հղումներով
Սիրելի հայրենակիցներ, մենք շատ ուրախ ենք տեսնել ձեր գրառումները եւ քննարկումները, սակայն հայհոյանքները ջնջվելու են, իսկ գռեհիկ գրառումների հեղինակները արգելափակվելուեն։
ՀԱՅԵՐԵՆ
Русский
English
Դաս. հայերեն
French
